Agar sizning juftingiz ko‘p hurrak otsa va shu odati bilan orziqib kutgan ta’tilingizga xalaqit qilsa, unda siz sayohat xizmatlari bozoridagi yangi taklif – hurrakchilar uchun maxsus turlarga bir nazar tashlashingiz lozim.
Belgiyadagi sayyohlik agentliklaridan biriga shunday turlarni tashkil qilish g‘oyasi keldi. Aytish joiz, bunday turlar ommalashishi mumkin.
Belgiya turoperatorlarining fikricha, bunday paketlar talabgir bo‘ladi. Turli tadqiqotlarga ko‘ra, dunyodagi ayollarning taxminan 24 foizi va erkaklarning 40 foizi hurrak otishdan aziyat chekadi. Ba’zi juftliklar bu muammoning yechimi sifatida alohida xonalarda uxlashni afzal ko‘rishadi.
“Ko‘p yillar davomida biz jufti qattiq hurrak otadigan er-xotinlardan deyarli har oy savollar olardik. Gap hurrak sababli uyida alohida uxlaydigan va birgalikda sayohat qila olmaydigan odamlar haqida borgan”, deb aytilmoqda sayyohlik agentligida.
Bunday vaziyatda mehmonxonalarda alohida xonalarni bron qilish qimmatga tushadi. Shu sababli hurrak otuvchilar uchun maxsus turlar o‘ylab topildi. Er-xotinga standart ikki kishilik xona o‘rniga tovush o‘tkazmaydigan eshik bilan ajratilgan ikkita yonma-yon xona taklif etiladi. Qizig‘i, siz bunda ikkinchi xonaning to‘liq narxini to‘lashingizga to‘g‘ri kelmaydi.
Ta’kidlanishicha, bunday xonalar chegirma bilan taqdim qilinadi. Biroq sayyohlik agentligida ularning aniq narxi ma’lum qilinmagan.
2024-yil mart oyidan ilk “hurrak”-turlarga jo‘nash mumkin bo‘ladi. Sayyohlarda Dubay va Abu Dabidagi bir nechta mehmonxonalardan birini tanlash imkoni bo‘ladi.
