Kuniga atigi 10 daqiqa sport bilan shug‘ullanish miya faoliyatiga ijobiy ta’sir ko‘rsatadi, kayfiyat va aqliy qobiliyatlarni yaxshilaydi. Bu haqda London qirollik kolleji professori, fizioterapevt va ruhiy salomatlik bo‘yicha tadqiqotchi Brendon Stabbs Daily Mirror nashriga ma’lum qildi.
Stabbsning ta’kidlashicha, kayfiyatga jismoniy mashqlar vaqtida ishlab chiqariladigan endorfinlar ta’sir qiladi, diqqat-e’tiborning yaxshilanishi esa miyaning prefrontal po‘stlog‘ini jonlantirish natijasidir. Bundan tashqari, sport bilan shug‘ullanish xavotirlanish darajasini pasaytiradi. Stabbsning tushuntirishicha, jismoniy mashqlar atrof-muhitda xavflarni izlashga mas’ul bo‘lgan va ba’zida keraksiz xavotirlarni keltirib chiqaradigan bodomsimon tanachaga ta’sir qiladi.
Shuningdek, jismoniy mashqlar gippokampni tiklashning yaxshi usuli hisoblanadi. Gippokamp miyaning xotiralarni hissiy qayta ishlah va saqlash uchun mas’ul qismi hisoblanadi. Mutaxassisning so‘zlariga ko‘ra, gippokamp ruhiy kasalliklar – depressiya, demensiya, xavotirlanishda kichrayadi. "O‘n daqiqalik mashg‘ulot miyaning ushbu sohasini jonlantiradi va vaqt o‘tishi bilan haqiqiy ijobiy o‘zgarishlarga xizmat qilishi mumkin", deb ta’kidlab o‘tgan Stabbs.
Olimning qo‘shimcha qilishicha, sport bilan muntazam shug‘ullanish yangi neyronlar va miya hujayralarini yaratish jarayonida ishtirok etadigan modda – miyaning neyrotrofik omilini (BDNF) ishlab chiqarishga yordam beradi.
