Ko‘p yillar davomida nafas olish mashqlari ongni tinchlantirish va xavotir bilan kurashish usuli sifatida ishlatib kelingan. Bunday usullar aqliy-xulq-atvor terapiyasi va dialektik xulq-atvor terapiyasi kabi davolash usullarining ajralmas qismi hisoblanadi. Biroq, hamma ham nafas olishga e’tiborli bo‘la olmaydi. Ba’zida xayollar qattiq chalg‘itishi va hatto xavotirli fikrlarga olib kelishi mumkin.
Buyuk Britaniyaning Bat universiteti kompyuterchi olimi Aleks Farroll o‘z shaklini o‘zgartiruvchi PAWS to‘pini ixtiro qildi.
Foydalanuvchilar nafas olishi va chiqarishiga qarab to‘p kengayadi va qisqaradi, bu esa ularga diqqatni jamlash va his-tuyg‘ularni nazorat qilishda yordam beradi. To‘p meditatsiya uchun ishlab chiqilgan dastur bilan birgalikda ishlatiladi.
"To‘p nafasga jismoniy shakl berib, ruhiy salomatlik uchun ijobiy natijalarga erishishda yordam beradi ", deb aytgan olim.
To‘pning sinovlarida 58 kishi ishitrok etgan. Uni meditatsiya uchun musiqa bilan birgalikda ishlatgan ishtirokchilar o‘zlarini ancha xotirjam his qilishgan. Bu odamlar orasida xavotirlanish darajasi o‘rtacha 75 foizga pasaygan, xavotirlanishga olib keluvchi fikrlardan himoya 56 foizga oshgan. Qizig‘i, musiqani to‘psiz tinglaganlarning xavotirlanish darajasi 31 foizgagina pasaygan. Bu shuni ko‘rsatadiki, nafasning jismoniy aks etishi haqiqatan ham tinchlantiruvchi ta’sirni ko‘p karra kuchaytirishi mumkin.
Bundan tashqari, to‘pni meditatsiya uchun musiqa bilan birgalikda ishlatish ishtirokchilarda yurak urish tezligining variabelligini oshirganini ko‘rsatgan. Yurak urishi variabelligining yuqori bo‘lishi stressga chidamlilik oshgani va ruhiy holat yaxshilanganidan dalolat beradi.
