Har bir inson sayohatlar davomida uzoq masofalarni o‘ziga xos tarzda bosib o‘tishni yaxshi ko‘radi. Kimdir yaqinlari bilan mashinada, kimdir samolyotda sayohat qilishni, yana boshqalar dengiz sayohatini yoki belgilangan manzilga poyezdda borishni xush ko‘radi. Quyida poyezdda sayohat qiluvchilar haqida gap boradi.
Poyezdda uzoq davom etuvchi safarlardan va oyna ortida ko‘z o‘ngingizdan o‘tayotgan manzaralardan zavqlanishni yoqtirasizmi? Unda temiryo‘l orqali sayohat qilish uchun dunyodagi eng uzun yo‘nalish sizni shubhasiz qiziqtiradi.
Reddit saytida e’lon qilingan ushbu sayohat taxminan 18755 kilometr yo‘lni qamraydi va 21 kun davom etadi. Bu uch hafta sayohat qilish demakdir. Ushbu yo‘nalish sizni Portugaliyadan Singapurgacha olib boradi.
Bu sayohatni amalga oshirish uchun siz Portugaliya janubidagi Lagos shahridan yo‘lga chiqishingiz kerak bo‘ladi. Ilk poyezd sizni Portugaliya poytaxti Lissabonga eltadi. Keyin u yerdan Fransiyaning Anday shahriga, so‘ngra Parijgacha borasiz. Fransiya poytaxtiga yetib borganingizdan so‘ng, siz Moskvaga 40 soatlik uzoq sayohatni boshlaysiz. U yerdan siz Pekinga yetib olishingiz mumkin. Bu ikki poytaxt orasida 160 soat davom etadigan va yetti kun talab qiladigan sayohatdir. So‘ngra Malayziyaga kelishdan oldin Laos va Tailandga sayohat qilasiz. Malayziya poytaxti Kuala-Lumpurdan esa Johor-Baru shahrigacha va u yerdan, nihoyat, Singapurga yetib kelasiz.
Bu yo‘nalish 13 ta davlat orqali o‘tadi va kamida yettita viza talab qiladi. Ushbu sayohat uchun sizga turar-joy va ovqatlanish xarajatlarini hisobga olmaganda, taxminan 1250 yevro kerak bo‘ladi. Safar xarajatlari anchagina, lekin poyezd atrof-muhitni eng kam ifloslantiruvchi transport turi hisoblanadi: 21 kunlik ushbu olis sayohat davomida poyezdda atmosferaga atigi 0,08 tonna, Lissabondan Singapurga samolyotda parvoz qilish vaqtida esa 1,67 tonna karbonat angidrid chiqariladi.
