Sayyohlarning katta oqimi tufayli Ispaniyaning Barselona shahrida Yevropa darajasidagi xizmat ko‘rsatishning asosiy tamoyillari buzila boshlandi. Ispaniya gazetalarining yozishicha, shahar restoranlari yakka holda kelgan mijozlarga birin-ketin xizmat ko‘rsatishdan bosh tortmoqda. Buning sababi oddiy: bir necha kishilik guruhlarga xizmat ko‘rsatish butun oqshom yolg‘iz mijozning ko‘nglini olishdan ko‘ra nafliroq.
Shahar markazidagi ba’zi restoranlarda tashrif buyuruvchilarga nisbatan bunday adolatsiz munosabat kuzatilgan. El Pais gazetasiga ko‘ra, ofitsiantlar bunday mijozlarga bo‘sh o‘rindiqlar yo‘qligini vaj qilib, joy taqdim qilishdan bosh tortishmoqda.
Hatto mahalliy aholi ham restoranga yolg‘iz, sheriklarsiz kelsangiz xodimlarning bunday qo‘pol munosabatidan shikoyat qila boshladi. Yakka kelgan mijozni eng noqulay joyga o‘tqazishlari (masalan, hojatxona yaqiniga), tanovul vaqtini 20 daqiqa bilan cheklashlari va chekni to‘lagandan so‘ng darhol tashqariga kuzatib qo‘yishlari mumkin. Mahalliy aholi mavsumning qizg‘in pallasida restoran terrasasida tinchgina o‘tirib, qahva ichib bo‘lmayaptganidan shikoyat qilmoqda.
So‘nggi yillarda Barselona dunyodagi eng mashhur 20 ta sayyohlik shaharlari reytingidan mustahkam o‘rin egallab kelmoqda. Bu mahalliy biznesni quvontiradi, biroq narxlarning oshishi va infratuzilmaga bosim ko‘rinishida oddiy aholiga noqulaylik tug‘diradi. Bir necha yil avval mahalliy aholi hatto ommaviy turizmga qarshi kampaniyani boshlagan, bu esa ko‘pchilik sayyohlarni hayron qoldirgan. Bundan tashqari, barselonaliklar sayyohlar oqimi ko‘payishidan xavotirda ulardan o‘z do‘stlari bilan sayohat taassurotlari bilan bo‘lishmaslikni va diqqatga sazovor joylar fotosuratlarini ijtimoiy tarmoqlarga joylamaslikni so‘rashgan.
