Amerikalik olimlar spirtli ichimliklarga qaramlikni davolashning yangi usulini ishlab chiqdilar. Gap alkogolizmga qarshi emlash haqida bormoqda.
Vaksina Ogayo shtati universiteti tibbiyot markazi xodimlari tomonidan ishlab chiqilgan. Uni yaratishda gen terapiyasidan foydalanilgan.
Vaksina negizida xavfsiz adenovirusga oqsilni kodlovchi genni biriktirish mexanizmi yotadi. U organizmga kirganda, hujayra ichiga oqsil genini kiritadi.
Vaksina miyaning quvonch va zavq gormoni – dofamin ishlab chiqarish uchun mas’ul bo‘lgan qismiga ta’sir qiladi. Spirtli ichimliklarga ruju qo‘yganlarda ushbu moddaning ishlab chiqarilishi keskin pasayadi, shu sababli ular spirtli ichimliklardan voz kechishi juda qiyin bo‘ladi. Biroq yangi vositani qo‘llashdan keyin organizm ko‘proq dofamin ishlab chiqarishni boshlaydi.
Mutaxassislar vaksinani maymunlarda sinab ko‘rishgan. Maymunlarda dastlab spirtli ichimliklarga qaramlik hosil qilingan, so‘ngra ular emlangan. Emlashdan birmuncha vaqt o‘tgach, hayvonlar spirtli ichimliklarni ommaviy tarzda rad qila boshlagan. Tez orada maymunlarning 90%dan ortig‘ida spirtli ichimliklarga qiziqish yo‘qolgan. Shifokorlar o‘z ixtirolari odamlarga ham yordam berishiga umid qilishmoqda. Vositaning klinik sinovlari boshlab yuborilgan, deb xabar bermoqda Nature Medicine portali.
