FloridaPanhandle.com turistik sayti dunyodagi 100 ta eng ommaviy dam olish joylarini tahlil qilib, ularda yashash, transport, yegulik va diqqatga sazovor joylarga tashrif uchun o‘rtacha narxlarni o‘rgandi.
Tahlilga ko‘ra, aviachiptani hisobga olmaganda eng qimmat 10 ta yo‘nalish quyidagicha ko‘rinish olgan. Bu joylarga tashrif, shubhasiz, mo‘maygina pul talab qiladi.
![]()
1. Gustaviya, Sen-Barts
2. Gshtaad, Shveysariya
3. Aspen, Kolorado
4. Park-Siti, Yuta
5. Maui, Gavayi
6. London, Angliya
7. Kakao oroli, Maldivlar
8. Maun, Botsvana
9. Katta Kayman, Kayman orollari
10. Monte-Karlo, Monako
Ro‘yxatning yuqori o‘rinlaridan orollar va hashamatli tog‘-chang‘i kurortlari joy olgan.
Karib dengizidagi Sen-Barts oroli dunyodagi eng qimmat dam olish joyi deb tan olingan. Bunga u yerdagi mehmonxonada bir kechani o‘tkazish o‘rtacha 1770 dollarni tashkil qilishi asosiy omil hisoblanadi.
![]()
Tadqiqotga ko‘ra, Shveysariyaning Gshtaadidagi mehmonxonada yashash sayyohlarga kuniga o‘rtacha 1360 dollarga tushadi. Alp tog‘larida joylashgan shahar, shuningdek, yegulik uchun sarf-xarajatlar borasida eng yuqori o‘rtacha qiymatlarni ko‘rsatgan. Bu shaharda taomlanish kuniga o‘rtacha 177 dollarga aylanadi.
![]()
AQSHning Kolorado shtatida joylashgan Aspenda yashash sayyohlarga kuniga 1385 dollarga aylanadi. Biroq aytish joiz, agar siz bu yerga oilaviy kelishni istasangiz, bu sizga anchagina arzonga tushadi – 4 kishilik oilaga kurortda dam olish uchun kuniga 2274 dollar kifoya qiladi.
AQSHning yana bir shtati Yutadagi Park-Siti tog‘-chang‘i kurortida bir kunlik ko‘ngilxushlik o‘rtacha 333 dollarga tushishi mumkin. Dam olish maskani bu borada ro‘yxatda yetakchilik qilmoqda.
Ro‘yxatdagi Afrikaning yagona vakili – Botsvanadagi Maun shahrida diqqatga sazovor joylarga, masalan, Okavango daryosi deltasiga tashrif buyurish kuniga o‘rtacha 100 dollarga tushadi
Sent-Barts va Maldiv orollarida diqqatga sazovor joylarga tashrif buyurish sayyohlarga bepul aylansa-da, biroq ular bu yerlardagi mehmonxonalarga mo‘maygina pul to‘lashlariga to‘g‘ri kelishi mumkin.
Monako knyazligi tarkibiga kiruvchi Monte-Karlo kazino ishqibozlarining eng sevimli joylaridan biri ekaniga qaramay, u diqqatga sazovor joylarga tashriflar narxi borasida past ko‘rsatkichlarni qayd qilgan.
![]()
“Monte-Karlo o‘z kazinolari bilan mashhur bo‘lsa-da, biroq qimor o‘yinlari bu shahardagi eng ommaviy mashg‘ulot hisoblanmaydi”, deb ta’kidlab o‘tgan FloridaPanhandle.com vakili.
Sayt ma’lumotlarga ko‘ra, Monte-Karlodagi eng diqqatga sazovor joylar uchtaligidan Monako okeanografiya muzeyi, “Kazino maydoni” deb nomlanuvchi ochiq maydon va Monte-Karlo kazinosi joy olgan.
