Internetda Yaponiya poytaxti Tokio bo‘ylab harakatlanayotgan va tomida ulkan gologrammalar namoyish qilingan avtobuslar videosi keng tarqaldi. Ba’zi foydalanuvchilar bunday gologrammalarni namoyish qilish umuman ilojsizligini ta’kidlayotgan bo‘lsa, boshqalari esa Yaponiya allaqachon “texnologiya borasida ming yilga oldinlab”, 2023-yilda emas, balki-3023 yilda yashayotganini aytmoqda.
Gap shundaki, yaqinda Yaponiyada mahalliy “Iokogama” va Angliyaning “Manchester Siti” futbol klublari o‘rtasida o‘rtoqlik uchrashuvi bo‘lib o‘tdi. Ingliz klubi a’zolari mehmonga tomida ulkan gologrammalar namoyish qilingan hamda barchaning diqqatini o‘ziga tortgan antiqa avtobuslarda kelishgan.
Gologrammalarda ingliz klubi futbolchilari va uning logotipi go‘yoki havoda suzayotgandek alfozda namoyish qilib borilgan. Foydalanuvchilardan biri tomonidan tasvirga olingan ushbu holat videosi esa internetda keng tarqalib, Twitter’da 10 mln.dan ko‘proq namoyish to‘plagan.
Ko‘pchilik “Bu haqiqatan ham mumkinmi?”, deya savol bilan yuzlanishgan va shundan keyin bahslar boshlanib ketgan. Kimlardir bunday gologrammalar mavjudligiga shubha bildirgan va uchrashuv tashkilotchilarini “feyk” tarqatishda ayblagan. Ularning ta’kidlashicha, aslida “ManSiti” futbolchilari oddiy avtobuslarda harakatlangan, gologrammalar esa shov-shuv ko‘tarish maqsadida keyinroq “fotoshop” orqali qo‘shib qo‘yilgan.
Boshqalarning fikricha esa, Yaponiya texnologiya borasida qolgan dunyodan shunchalik o‘zib ketganki, ularda bundan ham “fantastikroq” gologrammalar bor.
G‘arb OAVlarda chop etilgan rasmiy versiyaga ko‘ra, haqiqatda hech qanday gologrammalar bo‘lmagan. Ta’kidlanishicha, “kelajak texnologiyasi illyuziyasi”ni hosil qilish maqsadida avtobuslar tomida yorqin proyektorlar va katta shaffof ekranlar o‘rnatilgan bo‘lib, proyektorlar yordamida ekranlarga tasvir tushirilgan.
“Gologrammalar (ekranlar) shunchalik g‘ayrioddiyki, ular haqiqat ekani yoki yolg‘onligi borasida bahs ko‘tarilishiga sabab bo‘ldi”, deb ma’lum qilishgan klub vakillari. Biroq ularning bu izohi foydalanuvchilar orasidagi bahsni tinchlantirish o‘rniga ularda yana savollar paydo bo‘lishiga sabab bo‘lgan. Endi ular avtobuslarni bunday ulkan ekranlar bilan jihozlash imkonsizligini aytishmoqda. Aksariyat foydalanuvchilar avtobuslar bunday ekranlar bilan tunnel va ko‘priklar orqali qanday o‘tgan bo‘lishi mumkinligini aqllariga sig‘dira olmayaptilar.
