Xitoyning Xiaomi kompaniyasi Meet nomli noodatiy gadjet chiqardi. U o‘zidan katta o‘lchamli quloqchinlarga ega “aqlli” uyqu niqobini aks ettiradi.
Gadjet bilan qulay uxlash uchun albatta yuqoriga qarab yotish shart emas.
Qurilmani Android va iPhone'ga ulash mumkin. Alohida dasturda niqobdan foydalanish usullarini tanlash mumkin. Misol uchun, siz qurilma sokin musiqa ijro etadigan vaqtni belgilashingiz mumkin. Gadjet, shuningdek, uxlaganingizni tushunib, musiqani o‘chirib qo‘yishi mumkin. Bundan tashqari, quloqchinlar tashqi shovqinni o‘tkazmaydi.
Qurilmaning yana bir antiqa xususiyati unga o‘rnatilgan LED-displey hisoblanadi. Odam uxlayotganida bu ekran o‘chadi. Niqob foydalanuvchini baland ovoz bilan uyg‘otmaslik uchun go‘yoki tong otganday sariq chiroqni yoqadi. Mutaxassislarning fikricha, bunday uyg‘onish inson salomatligi va ruhiyatiga yaxshiroq ta’sir ko‘rsatadi.
Gadjetning korpusi plastikdan ishlangan. Yuzga tegadigan to‘r qismi nafas oluvchi matodan qilingan. Qurilmaning yon tomonida multimediani boshqarish tugmalari va zaryadlash uchun USB-C port mavjud.
Uyqu vaqtida niqob dam olishingizni tahlil qiladi va uyqungiz fazalari haqidagi ma’lumotlarga ega diagrammani tuzadi. Barcha ma’lumotlarni esa ertalab smartfoningizda ko‘rishingiz mumkin bo‘ladi. Niqob, avvalambor, ishdagi tanaffus vaqtida uxlab olishni xush ko‘ruvchi ofis xodimlari uchun yaratilgan. Biroq, qurilmadan uyda foydalanishingizga ham hech narsa to‘sqinlik qilmaydi.
Xiaomi Meet'ning narxi ham hayratlanarli darajada arzon. “Aqlli” aksessuarning narxi atigi 299 yuanni (40 dollar) tashkil etib, uning savdosi Xitoyda kraudfanding doirasida boshlangan. Qurilma boshqa davlatlarda ham sotuvga chiqarilishi borasida hozircha ma’lumot yo‘q.
