Xitoyning Xiaomi kompaniyasi yangi avloddagi yig‘ma smartfon chiqarishini e’lon qildi. Bu haqda GSM Arena nashri xabar bermoqda..
Kompaniya ma’lumotlariga ko‘ra, yangi qurilma Mix Fold 3 bozordagi eng ensiz yig‘iluvchi smartfon hisoblanadi. Uning korpusi eni ochiq holda 5,26 mm.ni, yig‘ilganda esa 10,89 mm.ni tashkil qiladi. Kompaniya muhandislari bunday natijaga erishish uchun yangi sharnir yaratishgan. Qurilmaning ekranini 135 gradusga ochish mumkin.
Gadjet ikkita OLED-displeyga ega: asosiy LTPO-ekran diagonali 8,03 duymni, ko‘rsatish qobiliyati 2160x1920 pikselni tashkil qiladi, tashqi LTPO-displey diagonali esa 6,56 duym va Gorilla Glass Victus 2 oynasi bilan himoyalangan.
Qurilma Snapdragon 8 Gen 2 protsessori, 16 gigabayt tezkor va 1 terabayt doimiy xotiraga ega. Gadjetning orqa tomonida 50, 12, 10 va 10 megapikselli to‘rtta kamera joylashgan. Smartfon Android 13 negizidagi MIUI 14 operatsion tizimida ishlaydi. Qurilma 67 vattli tez zaryadlashni qo‘llab-quvvatlaydigan 4800 milliamper-soatli akkumulatorga ega.
Mix Fold 3'ning standart versiyasi narxi 8999 yuan yoki 1230 AQSH dollarini tashkil etadi. 16 gigabayt operativ xotiraga ega top-modeli esa 10999 yuanga (1500 dollar) baholangan.
Janubiy Koreyaning Samsung korporatsiyasi iyul oyi oxirida yig‘iladigan smartfonlarining yangi avlodi - Galaxy Z Fold5 va Galaxy Z Flip5'ni taqdim qilgandi. Galaxy Z Fold5'ning bazaviy versiyasi narxi 1799 dollarni, Galaxy Z Flip5'niki esa 999 dollarni tashkil etadi.
