Britaniyalik milliarder Richard Brenson tomonidan asos solingan Virgin Galactic kompaniyasi 10 avgustda fazoga o‘zining ikkinchi tijoriy parvozini amalga oshirdi. Aytish joizki, bu kompaniyaning birinchi fazoviy turistik parvozi hisoblanadi.
Galactic 02 deb nomlangan parvoz Nyu-Meksikodagi “Amerika” kosmodromidan amalga oshirilgan. Fazoviy kemani uchuvchilar Si Jey Sturkou va Kelli Latimer boshqargan, uning o‘rindiqlaridan yana 4 kishi, jumladan, kompaniyaning bosh astronavt-instruktori Bet Mozes, fazoviy sayyohlar – britaniyalik sobiq olimpiyachi Jon Gudvin, Keysha Shaxaff va Anastatiya Mayers bo‘lgan. Qizig‘i, Shaxaff va Mayers parvoz qilish imkoniyatini Space for Humanity notijorat tashkiloti tomonidan o‘tkazilgan lotereya orqali yutib olishgan.
![]()
Parvoz Yerdan 80 km balandlikda o‘tgan. AQSHda aynan shu balandlik fazoga o‘tish chegarasi deb tan olinadi. Fazoviy kema parvoz muvaffaqiyatli amalga oshirilgach, kosmodromga qaytgan.
Korporatsiya o‘z parvozi uchun ikki pog‘onali tizimdan foydalangan. Bu turdagi parvoz Ilon Maskning SpaceX kompaniyasi amalga oshiruvchi uzoq davom etuvchi, murakkab va qimmat fazoviy parvozlardan farqli o‘laroq, yo‘lovchilarga vaznsizlik holatida 2 daqiqagacha bo‘lish imkonini beradi.
Joriy parvoz Virgin Galactic’ning hozirgi kungacha yettinchi va 2023-yil may oyidan beri uchinchi parvozi hisoblanadi. Kompaniya VSS Unity kemasini har oy fazoga uchirishni o‘z oldiga maqsad qilgan. Bundan tashqari, u haftalik parvozlar uchun “Delta-klass” nomli fazoviy kemalarni ishlab chiqmoqda. Ushbu kemalar parvozi 2026-yilga mo‘ljallangan.
Kompaniya o‘zining ilk tijoriy parvozi Galactic 01’ni iyunda amalga oshirgandi. O‘shanda kema bortidan Italiya harbiy-havo kuchlarining 3 nafar xizmatchisi joy olgan.
Hozirda Virgin Galactic’da 800 ga yaqin kishi fazoviy parvozni amalga oshirish uchun o‘z navbatini kutmoqda. Parvozlar uchun chiptalarning aksariyati o‘n yil avvalroq 200 ming dollardan 250 ming dollargacha narxda sotilgan va shundan keyin to‘xtatilgan. Ikki yil avval kompaniya 450 ming dollardan yana chiptalar sotuvini yo‘lga qo‘ygan.
