AQSHning Aeronavtika va fazoni tadqiq qilish agentligi NASA o‘zining Ingenuity vertolyoti Marsda yangi rekord parvozni amalga oshirganini ma’lum qildi. Qurilmaning rekord 59-parvozi 2023-yil 16-sentabrda amalga oshirilgan.
Parvoz davomida vertolyot rekord balandlikka – Qizil sayyora sirtidan 20 metr yuqoriga ko‘tarildi. Parvoz vaqtida qurilma gorizontal yo‘nalishda hech qanday masofani bosib o‘tmasdan, shunchaki sirtdan ko‘tarilib-tushgan. Vertolyot umumiy hisobda 142,59 soniya davomida "muallaq" qolgan.
Qurilma bungacha Marsda ko‘tarilgan eng yuqori balandlik 18 metrni tashkil qilayotgandi.
Vertolyotning 59-parvozi u uchun yangi tarixning boshlanishini belgilab berdi, chunki Marsda vertolyot olimlar taxmin qilganidan balandroq ucha olishi isbotlandi.
Ingenuity vertolyoti 2021-yil 18-fevralda Yezero krateriga qo‘ngan Perseverance marsoxodi pastki qismiga biriktirilgan holda Marsga yetkazilgan edi. Vertolyotning asosiy maqsadlari texnologiyalarni namoyish qilish, Marsda ilk parvozlarni amalga oshirish va Perseverance uchun qidiruv ishlarini olib borishdan iborat.
Qurilma parvozlari davomida Mars havosida jami 106 daqiqadan ko‘proq vaqt qolib, 13,3 km masofani bosib o‘tgan.
