Qozonda odam organizmini skrining tekshiruvdan o‘tkazish uchun sun’iy intellekt va VR-shlemdan foydalanadigan “boqiylik kapsulasi” nomli majmua ishlab chiqildi.
Ushbu majmua yordamida yurak, jigar, buyraklarni skanerlash, qon bosimi, puls, qondagi kislorod va shakar darajasini o‘lchash, shuningdek, xavfli kasalliklarni vaqtida aniqlash uchun qon tomirlari va asab tizimining holatini baholash mumkin. Jarayon kapsula shaklida tayyorlangan maxsus kursida amalga oshiriladi.
Jarayon juda sodda kechadi: tekshiriladigan odam kursiga o‘tiradi va ikki daqiqa davomida neyrotarmoq tomonidan ma’lumotlar qayta ishlangach, dastlabki tashxis qo‘yiladi hamda tegishli mutaxassislarga tashrif buyurish bo‘yicha tavsiyalar beriladi.
Qurilma xavfli kasalliklarni erta aniqlash imkonini beradi.
Majmua, shuningdek, qo‘shimcha omillar - terining holati, ko‘zning oqi va hatto tekshiriluvchining ovozini ham hisobga oladi. Misol uchun, ovozni tahlil qilish orqali algoritm aqliy zaiflik (demensiya) rivojlanishi xavfini oldindan ayta oladi. Bundan tashqari, qurilma massaj kursisi yoki kislorod niqobi sifatida ishlatilishi ham mumkin.
"Boqiylik kapsulasi" nafaqat turli kasalliklarning xavfini aniqlaydi, kerak bo‘lsa, bemorga ta’tilga chiqishni tavsiya qilishi ham mumkin. Ushbu tavsiya umumiy skrining natijasiga asoslanadi. Ishlab chiquvchilar nafaqat virtual shifokorni, balki muammolaringizni bemalol aytishingiz mumkin bo‘lgan haqiqiy maslahatchi do‘stni yaratishga intilishgan.
Loyiha mualliflari kapsula qanchalik talabgir bo‘lishini hali o‘rnatishmagan va talabni o‘rganishda davom etishmoqda. Qurilmani chakana sotish rejalashtirilmagan, shuning uchun uning asosiy xaridorlari korxonalar, firmalar va tibbiyot muassasalari bo‘lishi kutilmoqda. Shunga qaramay, ushbu innovatsion kursiga allaqachon uchta buyurtma olingan. Uning narxi 12 million rublga baholanmoqda.
