Avstriyaning oziq-ovqat texnologiyalari sohasidagi Revo Foods startapi REWE supermarketida 3D-printerda bosilgan losos balig‘i go‘shtini sotuvga chiqardi. Mikoproteinga asoslangan ushbu baliq go‘shti supermarketlarda sotuvga chiqarilgan birinchi 3D-bosma oziq-ovqat mahsuloti bo‘ldi. Bu shuni anglatadiki, texnologiya endi sanoat miqyosigacha kengayishga tayyor va yaqin kelajakda bu borada ko‘plab yangiliklarni kutish mumkin bo‘ladi.
Baliq go‘shtini bosishga umuman qanday hojat bor? Hamma gap haddan ko‘p baliq ovlanishi bilan bog‘liq bo‘lib, dunyodagi baliq zaxiralarining 60 foizga yaqini bunga uchraydi. Bu okean ekotizimini barbod qilish xavfini soladi. Baliqchilik sanoati okeanlarning plastik bilan ifloslanishining asosiy sababi hisoblanadi. Dengiz biologik turfa xilligining tanazzulga uchrashi dunyo bo‘ylab okeanlardan oziq-ovqat va daromad manbayi sifatida foydalanuvchi 3 milliard odam uchun falokatli bo‘ladi.
Marjon riflarining keskin yo‘qolib ketishi, toksinlar darajasining ko‘tarilishi va baliqlarning mikroplastik bilan ifloslanishiga qaramay, so‘nggi o‘n yilliklarda dengiz mahsulotlariga talab faqat ko‘paymoqda. Bu talabni qondirishning muqobil yo‘llaridan biri vegetarian dengiz mahsulotlari hisoblanadi.
Revo Foods o‘zining 3D-MassFormer texnologiyasidan foydalangan holda 3D-bosma oziq-ovqat mahsulotlarini katta hajmlarda ishlab chiqarish imkonini beruvchi birinchi uzluksiz ishlab chiqarish jarayonini yaratdi.
3D-printerda bosilgan baliq go‘shtidagi asosiy masalliq ipli qo‘ziqorinlardan yaratilgan mikoprotein hisoblanadi. U ajoyib ozuqaviy qiymatga va tabiiy go‘shtga xos tuzilishga ega. Ushbu go‘sht juda ko‘p protein va omega-3 yog‘ kislotalariga boy. Mikoprotein ishlab chiqarish an’anaviy baliq sanoatiga nisbatan minimal qayta ishlash va suv kabi zaxiralardan kam foydalanishni talab qiladi, bu esa uni ekologik jihatdan sofroq variantga aylantiradi.
Revo Foods va Shvetsiyaning Mycorena startapi 3D-bosmada foydalanish uchun maxsus yaratilgan "Promyc" nomli mikoprotein moddasini birgalikda ishlab chiqqan.
Yangi mahsulotni taklif qiladigan birinchi savdo hamkori Yevropadagi eng yirik chakana savdo kompaniyalaridan biri bo‘lgan REWE/BILLA bo‘ldi. Shuningdek, 1-oktabrdan boshlab ushbu baliq go‘shtini butun Yevropa bo‘ylab Revo Foods internet-do‘konidan buyurtirish mumkin bo‘ladi.
