15 avgustda Bambu kompaniyasi 3D printerlarining egalari o‘ta noxush holatga duch kelishdi. Deyarli barcha foydalanuvchilarda ushbu printerlar «aqldan oza boshladi» - qurilmalar o‘z-o‘zidan yoqilib, turli narsalar bosa boshlagan va oxir-oqibat ishdan chiqqan.
Gonkong kompaniyasi muammoni tan oldi va o‘z veb-saytida uzr keltirdi. Kompaniya vakillarining ta’kidlashicha, muammo faqat Bambu X1C va P1P modellariga tegishli bo‘lgan. Ushbu 3D printerlar juda ommalashgan va ko‘plab davlatlarda sotiladi.
Garchi "mashinalar qo‘zg‘oloni" faqat Xitoyda e’lon qilingan bo‘lsa-da, bu muammoga boshqa davlatlardagi foydalanuvchilar ham to‘qnash kelgan. Printer yarim tunda o‘z-o‘zidan ishga tushib ketganidan uyg‘onib ketgan odamlarning ahvolini bir tasavvur qilib ko‘ring-a.
Ba’zi foydalanuvchilarda 3D printerlar o‘chirilishidan oldin bajargan ishni takror bosa boshlagan. Boshqalarda esa printerlar o‘z-o‘zidan yoqilib, hali yakunlanmagan shakllar ustiga «o‘zboshimchalik» bilan boshqa shakllarni bosa boshlagan, bu esa oxir-oqibat printerning ishdan chiqishiga olib kelgan.
Ma’lumot uchun, 3D printerlar juda katta hajmga ega va ishlash jarayonida juda qizib ketadi. Agar foydalanuvchi zarur choralarni ko‘rmasa, nazoratsiz bosish qurilmaning buzilishiga va hatto yong‘inga olib kelishi mumkin. Printer beruxsat va nazoratsiz ishlasa, bu choralarni qanday ham ko‘rish mumkin.
Bu holat nima uchun bu sodir bo‘ldi?
Kompaniyada tushuntirilishicha, unda barcha printerlarni masofadan boshqarish bulutli tizimi mavjud. Noma’lum sabablarga ko‘ra, aynan shu tizim ishdan chiqib, 3D printerlarni o‘zlaridan so‘ralmagan vazifalarni bajarishga majbur qilgan.
Bambu hozirda ichki tekshiruv o‘tkazmoqda va jabrlanuvchilarning arizalarini qabul qilishni boshlagan. Kompaniya barcha aybni o‘z zimmasiga olib, foydalanuvchilardan zararni baholash va kompaniyaning texnik yordamiga bu haqda yozishni so‘ragan. Ehtimol, bu yetkazilgan zararni qoplash maqsadida amalga oshirilayotgan bo‘lishi mumkin.
