Amerikalik aktyor Jeyms Din o‘limidan deyarli 70 yil o‘tib, yangi filmda “suratga tushishi” mumkin. Buni BBC nashriga immersiv texnologiyalarga ixtisoslashgan WorldwideXR agentligi ijrochi direktori Trevis Kloyd ma’lum qildi.
Gap “Edemga qaytish” (Back to Edem) filmi haqida bormoqda. Buning uchun aktyorning raqamli kloni yaratiladi – u kadrda xuddi tirikdek rol ijro etadi va haqiqiy aktyorlar bilan muloqot qiladi. Film ilmiy fantastika janrida bo‘lib, "haqiqat izlash maqsadida o‘zga sayyoralikning Yerga tashrifi AQSH bo‘ylab sayohatga olib kelishi" haqidadir.
Jeyms Din 1955-yilda 24 yoshida avtohalokatda vafot etgan, u faqat uchta filmda suratga tushishga muvaffaq bo‘lgan. Bular – “Jannatdan sharqda”, ‘“Sababsiz isyonchi” va “Gigant” filmlari. WorldwideXR tomonidan marhum aktyorning qarindoshlaridan olingan u ishtirokidagi kinolavhalar, suratlari va audioyozuvlar yangi film uchun aktyor obrazini gavdalantirishda yordam beradi.
Bu Dinning raqamli klonini suratga olishga ikkinchi urinishdir. 2019-yilda aktyorni “Jekni izlab” (Finding Jack) filmi uchun kompyuter grafikasi yordamida “tiriltirish”ga urinish amalga oshirilgan. Biroq keyinroq bu g‘oyadan voz kechilgan. Bunga, ehtimol, bunday "tiriltirish"ga ba‘zi aktyorlarning qarshi chiqqani sabab bo‘lishi mumkin.
