Sayyoramizdagi oltinning qariyb 99 foizi uning yadrosida mujassamlashgan. Bu haqda avstraliyalik olimlar Nature jurnalida chop etilgan maqolada ma’lum qilishdi.
Olimlar asteroidlardan hosil bo‘lgan xondrit meteoritlarining kimyoviy tarkibini o‘rganish natijasida shunday xulosaga kelishdi. Gap shundaki, bu asteroidlar protoplanetar diskning Yer paydo bo‘lgan qismidan hosil bo‘lgan, shu sababli sayyoramiz va ushbu asteroidlar bir xil tarkibga ega.
Olimlar dastlab sayyoramizdagi barcha elementlarning foizdagi nisbatini aniqlaganlar, keyin esa bu moddalarning Yer qobig‘i va mantiyasidagi ma’lum miqdorini ayirganlar. Natijada ular yadroda qanday moddalar va qancha miqdorda borligini aniqlashgan. Ma’lum bo‘lishicha, yadroda Yerdagi jami oltinning 99 foizga yaqini to‘plangan. Agar bu miqdordagi oltin bilan Yerdagi butun quruqlik qoplansa, unda 50 santimetr qalinlikdagi qatlam hosil bo‘ladi.
Ammo bu ulkan xazina bilan nima qilish mumkin? Axir, bunday chuqurliklardan uni chiqarib bo‘lmaydi. Biroq koinotda uchib yurgan “boylik”ni qo‘lga kiritish ancha yengilroq. Yaqin oylarda AQSHning NASA koinot agentligi Psixeya asteroidiga zond yuborishni rejalashtirmoqda. Asteroid ko‘plab tabiiy zaxiralar bilan to‘lib-toshgan. Bular nafaqat temir va nikel, balki noyob metallar, jumladan, oltin, platina, kobalt, iridiy, reniydir. Ular fazoviy jismda shunchalik ko‘p miqdordaki, taxminiy hisob-kitoblarga ko‘ra, ularning narxi taxminan 10 kvintillion dollarni tashkil qiladi. Bu esa hozirgi butun jahon iqtisodiyotidan bir necha baravar ko‘pdir.
