«Roskosmos» agentligi “Luna-25” sayyoralararo stansiyasining Oy yuzasi bilan to‘qnashganini ma’lum qildi. Stansiya bilan bog‘langan umidlar kattaligiga qaramay, missiya murakkab edi va qurilmani Oyga qo‘ndirishning uddasidan chiqilmadi – uni Oyga qo‘nishdan oldin kerakli orbitaga chiqarishi kerak bo‘lgan tizim nosoz ishlagan. Stansiya 11-avgust kuni Oyga yuborilgan edi.
19-avgustda stansiyaning Oyga qo‘nishdan oldingi orbitasini shakllantirishi kerak bo‘lgan impulsni chiqarish bosqichi rejalashtirilgan edi. Biroq shu kuni Moskva vaqti bilan soat 14:57da stansiya bilan aloqa birdan uzilib qolgan.
Shundan keyin mutaxassislar qurilmani qidirishga va u bilan aloqani tiklashga tushib ketganlar. Afsuski, 19- va 20-avgustda amalga oshirilgan barcha urinishlar kerakli natijani bermagan. Dastlabki ma’lumotlarga ko‘ra, falokatga impuls ko‘rsatkichlarining hisoblashlardagidan chetga og‘ishi sabab bo‘lgan. Bu "Luna-25"ning belgilanmagan orbitaga chiqib, Oy yuzasi bilan to‘qnashishiga olib kelgan.
Avvalroq missiyani muvaffaqiyatli yakunlash ehtimoli ancha yuqori baholanayotgandi.
“Luna-25” so‘nggi yarim asr ichida Rossiyaning Oyga amalga oshirgan birinchi missiyasi bo‘ldi. Stansiya 11-avgustda Amur viloyatidagi Vostochniy kosmodromidan uchirilgandi. Stansiyani 21-avgustdan 24-avgustgacha oraliqda Oyga qo‘ndirish rejalashtirilgandi va u 16- avgustda Oy atrofidagi orbitaga muvaffaqiyatli chiqqandi ham. Stansiyaning “umri” qisqa bo‘lishiga qaramay, u bir qator tadqiqotlarni o‘tkazishga, jumladan, gamma nurlar va neytronlar oqimini o‘lchashga muvaffaq bo‘ldi.
Oxirgi shunday loyiha – “Luna-24” 1976-yilda sobiq ittifoq olimlari tomonidan amalga oshirilgan. O‘shanda qurilma Yerga tarkibida suv bo‘lgan 170 gramm Oy tuprog‘ini keltirgan.
“Luna-25” falokati fazoviy tadqiqotlarning murakkabligi va uzoq fazonining hali ham mavhumligini yana bir bor eslatdi. Hozirgi texnologik rivojlanishga qaramay, Oyni tadqiq qilish mushkul va xavfli vazifa bo‘lib qolmoqda. Yer tabiiy yo‘ldoshining muvaffaqiyatli o‘rganishga umidlar hamon saqlanib qolmoqda va yaqin kelajakda, shubhasiz, bu borada yangi missiyalar amalga oshiriladi.
