Nyu-Yorkda joylashgan PathSpot startapi tozalikka rioya qilish muhim bo‘lgan barcha korxona va muassasalar ishini ancha yengillashtiradigan qurilma yaratdi. Bu fluoressent spektroskopiya yordamida ikki soniya ichida odamning qo‘lida patogen mikroblar bor-yo‘qligini aniqlovchi va ular haqida ogohlantiruvchi skanerdir. Kompaniyada ta’kidlanishicha, umumiy ovqatlanish shoxobchalari, tibbiyot, maktabgacha ta’lim muassasalari, fermer xo‘jaliklari va boshqa muassasalar bunday skanerlarga ko‘plab buyurtma bermoqda.
Skaner odatda xodimlar ish boshlashdan oldin va ish davomida qo‘lini yuvadigan rakovina oldidagi devorga osib qo‘yiladi. Ishchilar qo‘llarini yuvib, ularni skanerga keltirishadi va qo‘llari tozaligi yoki ularni yanada yaxshiroq yuvish kerakligini bilib olishadi. Skaner eng keng tarqalgan patogenlarni, jumladan, ichak tayoqchasi, norovirus, salmonella, gepatit A virusi, listeriya va boshqalarni aniqlay oladi.
Startap asoschilaridan biri Kristin Shindlerning so‘zlariga ko‘ra, ko‘p hollarda odamlar qo‘llarini ko‘piklab ishqalashsa-da, ularni yaxshi yuvmaydilar. Uning aytishicha, qo‘llarda zararli mikroblar yo‘q bo‘lishi uchun ularni sovunlagach, kamida 20 soniya davomida yaxshilab ishqalab yuvish lozim. Bunda nafaqat kaftlarni, balki barmoqlar orasini va bilaklarni ham yuvish kerak. Bundan tashqari, tirnoq ostidagi kirni ham unutmaslik lozim.
Skanerdan foydalanish, shuningdek, muayyan bir korxona yoki muassasa xodimlari o‘rtasida qo‘l tozaligi bilan bog‘liq qanday muammolar ko‘p uchrashi haqidagi ma’lumotni yig‘ish va real vaqt rejimida uni ekranga chiqarish imkonini beradi.
Bundan tashqari, qurilma oxirgi marta qo‘l yuvilganidan beri o‘tgan vaqtni hisoblaydi va zarurat bo‘lganda, qo‘llar tozaligini yana bir bor tekshirish haqida eslatadi. Tahlillar shuni ko‘rsatdiki, skanerdan foydalanishning birinchi oyida xodimlar yoki mijozlar o‘rtasida infeksiya yuqtirish holatlari 75 foizga, 6 oydan keyin esa 90 foizga kamaygan.
