Yaponiyaning TSUBAME kompaniyasi Arcax robotining ulkan prototipini yaratdi. Robot butunlay odam tomonidan boshqariladi. U futuristik ko‘rinishga ega hamda manipulyatorli yuk tashuvchi va harakatlanuvchi platforma qorishmasi hisoblanadi.
Arcax ancha salobatli ko‘rinadi: uning balandligi 4,5 metrni, vazni 3,5 tonnani tashkil qiladi. Qurilma uzunligi va eni bo‘yicha kichik yuk mashinasini eslatib yuboradi.
Robot korpusi mustahkamlangan tolali plastmassadan yasalgan. Unga qo‘lda ishlov berilgan va sayqallangan hamda ko‘proq taassurot qoldirishi uchun avtomobil bo‘yog‘i bilan qoplangan.
Korpus butun perimetri bo‘ylab va turli qismlarida ko‘p sonli LED-yoritgichlar bilan jihozlangan. Ular nafaqat bezak, balki robotning holati va uning ishlash rejimlari (harakatlanish, bir shakldan boshia shaklga o‘tish, ishchi holat) haqida ma’lumot beruvchi yorug‘lik indikatori sifatida ham xizmat qiladi.
Robotning o‘ziga xos jihatlari uning funksional manipulyator-qo‘llari va g‘ildirakli platformasini o‘zgartira olishi hisoblanadi. Robot tezroq va barqarorroq yurish uchun biroz cho‘kadi va g‘ildirak bazasi uzayadi.
Robot ichida operator atrofni yaxshiroq ko‘rishi uchun uchta monitor bor. Ularga atrof tasvirlari robot korpusi perimetri bo‘ylab o‘rnatilgan kameralar orqali uzatiladi. Robotni kuchli elektr dvigatel harakatga keltiradi.
