Avvallari davlatlar koinotni zabt etish yoki qurollanish bo‘yicha poyga uyushtirgan bo‘lsa, endilikda ular texnologiya sohasida, jumladan, eng kuchli superkompyuter yaratish borasida bahslashmoqda. Yaqinda Xitoyda dunyodagi eng kuchli kompyuter Sunway yaratilgani haqida ilk ma’lumotlar paydo bo‘ldi.
Ta’kidlanishicha, Sunway TaihuLight kompyuteri iPhone 14 Pro‘dan 2-3 milliard karra kuchliroq. Bu ulkan mashina 40 million yadrodan iborat.
Superkompyuter 5 ekzaflops unumdorlikka ega. Bu juda katta raqamdir. Taqqoslash uchun shuni aytish mumkinki, Sunway'ning bosh raqobatchisi – Intel kompaniyasining Aurora superkompyuteri unumdorligi 2 ekzaflopsni tashkil qiladi.
2023-yil 12–17-noyabr kunlari bo‘lib o‘tadigan Supercomputing 2023 ko‘rgazmasida xitoyliklar yangi superkompyuter haqida batafsil ma’lumot berishadi. Hozircha kompyuter haqida shu ma’lumki, u 40 million yadroga ega. Bu qanday yadrolar ekani ham noma’lum. Ehtimol, ular Sunway TaihuLight'ning avvalgi modelidagi kabi RISC-V arxitekturasida qurilgan bo‘lishi mumkin.
Xitoylik muhandislar bunday unumdorlikka qanday qilib erisha olishgani, shuningdek, Sunway qanday qurilmaviy ta’minotda ishlashi haqida noyabrda keng jamoatchilikka ma’lum qilishadi. O‘shanda kompyuterdan qanday maqsadlarda foydalanish mumkinligiga ham oydinlik kiritiladi.
