Apple kompaniyasi yangi mahsulotlarining sentabr oyidagi an’anaviy taqdimotiga oz fursat qoldi. Shu sababli, kompaniya taqdim etadigan yangi qurilmalar haqida tobora ko‘proq ma’lumotlar paydo bo‘lmoqda.
9to5Mac nashri insayder Endryu O'Xaraga tayanib, kompaniyaning yangi iPhone 15 Pro Max premium modeli nomi o‘zgargani haqida ma’lum qildi. Xabarga ko‘ra, ayfonning yangi modeli iPhone 15 Ultra nomi bilan chiqariladi.
Insayder bunga 80 foiz ishonchi komilligini aytgan. Avvalroq boshqa insayderlar ham Apple'ning yangi qurilmasi nomi o‘zgarishini aytishgan. Ushbu gaplar rost-yolg‘onligiga tez orada oydinlik kiritiladi.
iPhone 15 Ultra kompaniyaning eng qimmat smartfoni bo‘ladi. U titandan ishlangan mustahkam korpus va ilg‘or kamera bilan jihozlanadi. Qurilmaning narxi 1199 dollar yoki hattoki 1299 dollar, ya’ni iPhone 14 Pro Max'dan 100-200 dollar qimmatroq bo‘lishi mumkin.
Apple taqdimotining rasmiy sanasi hozircha sirligicha qolmoqda. U 12- yoki 13-sentabrda o‘tishi ehtimoli katta.
Bloomberg ma’lumotlariga ko‘ra, iPhone 15 va 15 Pro dasturlashtiriladigan yangi Action Button tugmasi bilan jihozlanadi. Ushbu tugma telefonni shovqinsiz rejimga o‘tkazish tugmasi o‘rnini egallaydi. Qurilmalar displeylari past bosimda quyish texnologiyasi LIPO‘dan foydalangan holda ishlab chiqariladi, buning natijasida ekran ramkasining eni 0,7 mm.ga kamayib, 1,5 mm.ni tashkil qiladi.
iPhone 15 Pro korpusining ramkasi zanglamaydigan po‘latdan emas, balki titan qotishmasidan tayyorlanadi. Ushbu material allaqachon Apple Watch'da qo‘llanadi va samarali ekanini isbotlangan. Gadjetning orqa paneli oqish oynadan tayyorlanadi.
