Audiouskunalar ishlab chiqaruvchi Bose kompaniyasining sobiq xodimlari uyqu uchun mo‘ljallangan Sleepbuds simsiz “aqlli” quloqchinlarini ishlab chiqishdi. Qurilma hatto havo haroratini ham o‘lchashi mumkin.
Aytish joiz, Sleepbuds avval Bose tomonidan ishlab chiqarilgan, ammo kompaniya 2020-yilda bu g‘oyadan voz kechgan. Uch yil o‘tgach, kompaniyaning sobiq uch xodimi ushbu modelni Ozlo Sleepbuds brendi ostida “qayta tiriltirish”ga qaror qildi.
Sleepbuds o‘zida quloqchinlar, quloq tiqinlari va uyquni kuzatuvchi qurilmani mujassamlashtirgan. Quloqchinlar shakli foydalanuvchiga keraksiz tashqi tovushlardan xalos bo‘lish imkonini beradi, sokin dinamiklar esa uni chuqur uyquga ketishi uchun musiqa ijro etib turadi. Ma’lum qilinishicha, quloqchinlar yengil va hatto yonboshlab uxlasangiz ham halaqit qilmaydi.
Eshitish vositasi qayta quvvatlashsiz 10 soatgacha ishlashi mumkin – bu bir tun uchun yetarli bo‘ladi. Sleepbuds taqib yurilgan butun vaqt davomida foydalanuvchining uyqusini tahlil qilib boradi.
Quloqchinlar harakatlanishni aniqlash va nafas olishni kuzatish texnologiyasini olgan. Ushbu texnologiya yordamida qurilma uyqu vaqtida qanchalik bezovta bo‘lganingizni, qanchalik miriqib uxlaganingizni, qancha vaqt uxlashga harakat qilganingizni va umuman, uyqu qancha vaqt davom etganini aniqlaydi. Shuningdek, quloqchinlar uyqu fazalarini aniq belgilaydi - barcha ma’lumotlar Apple Health yoki Android Health bilan sinxronlashtiriladi.
Quloqchinlar saqlanadigan keys ham “aqlli” chiqdi. U havo harorati, xonadagi shovqin va ortiqcha yorug‘lik miqdorini o‘lchaydigan datchiklar tizimini olgan. Ushbu ma’lumotlarning barchasi odamning yaxshi dam olishiga nima to‘sqinlik qilgani va uyqu sifatini qanday yaxshilash mumkinligini bilishga imkon beradi.
Ayni vaqtda “aqlli” quloqchinlarni Kickstarter platformasida oldindan buyurtma berish orqali xarid qilish mumkin. Qurilmaning chakana narxi 250 dollarni tashkil qiladi. Uning ommaviy savdosi joriy yil oxiridan boshlanadi.
