Nemis startapi Clip Mouse qurilmasini taqdim etdi. U kompyuter sichqonchasi kabi ishlaydi, biroq barmoqlarga taqiladi va biror yuzada harakatlantirishni talab etmaydi.
Gadjet U harfi shaklidagi qisqichga o‘xshaydi. U qo‘lning ko‘rsatkich va o‘rta barmoqlariga taqiladi. Qurilma akselerometr va litiy-ionli akkumulator negizida ishlaydi.
Qurilmaning ishlash prinsipi oddiy: buning uchun foydalanuvchi an’anaviy sichqonchada ishlayotgandek harakatlarni bajarishi kerak, qurilma esa harakatlanishni aniqlab, Bluetooth orqali kompyuterga tegishli buyruqlarni uzatadi. Shu sababli, qurilmani tekis sirtda ishlatish shart emas.
Sichqonchaning pastki qismi tegishlarga sezgir hamda chap va o‘ng tugmalar sifatida ishlatiladi. Dasturlardagi pastga-yuqoriga harakatlantirish g‘ildiragini siljitish uchun siz barmog‘ingiz bilan havoda xuddi shunday harakatlarni bajarishingiz kerak bo‘ladi.
Sichqonchani yon panelidagi tugmani bosish orqali o‘chirib qo‘yish mumkin. Bundan tashqari, ushbu tugma zarurat bo‘lganda kursorni ekranning o‘rtasiga joylashtirishda ham ishlatiladi.
Startapda ta’kidlanishicha, qurilma bir quvvatlanishda 50 soatgacha ishlay oladi. Zaryadlash uchun USB port mavjud.
Clip Mouse'ni Kickstarter platformasida 59 yevroga buyurtirish mumkin. Qurilmalar oktabr oyidan boshlab mijozlarga yetkazila boshlanadi.
