Android operatsion tizimida ishlovchi telefonning narxi 6 999 yuandan (890 dollar) 7499 yuangacha (1 027 dollar) turadi va Nio‘ning barcha 8 ta avtomobil modeli bilan mos tushadi. Smartfon Lens Technology kompaniyasi tomonidan ishlab chiqariladi. Ushbu kompaniya smartfonlar uchun linzalarni ishlab chiqaradi va uning mijozlari orasida Apple ham bor.
Nio Phone aslida uchta modeldan iborat bo‘lib, ularning har biri turli xil xotiraga ega, ammo barchasida 6,81 duymli ekran qo‘llangan. Bu smartfonni Apple iPhone 15 Pro Max'dan biroz kattaroq qiladi.
Smartfonning tezkor xotirasi 12 Gb dan 16 Gb gacha, doimiy xotirasi esa 512 Gb yoki 1 TB ni tashkil qiladi. Qurilmaning 5200 mA-soat sig‘imli akkumulatorini 66 Vtli simli yoki 50 Vtli simsiz quvvatlagich orqali quvvatlash mumkin. Uchta model ham Qualcomm Snapdragon 8 Gen 2 protsessorida ishlaydi. Nio Phone, shuningdek, 50 MPli keng, o‘ta keng va periskop datchiklari bo‘lgan uch kameraga ega.
Ta’kidlanishicha, Nio telefonining aqlli elektr transport vositalariga ulash avtomobillarni xavfsizroq, qiziqarli hamda o‘yin va ish uchun foydali qiladi.
Bu orada Xitoyning smartfon ishlab chiqaruvchi Xiaomi kompaniyasi esa, aksincha, 2024-yil boshida o‘zining birinchi aqlli elektromobilini yaratmoqchi.
Xitoyda elektr transport vositalarining jozibadorligi ular qanchalik uzoq yura olishi yoki arzonligi bilan emas, balki qanchalik aqlli ekanligi bilan belgilanadi.
Ta’kidlanishicha, Nio 2014-yilda tashkil etilganidan beri hali foyda keltirmagan. U Xpeng va Li Auto kompaniyalari bilan birga Tesla'ning Xitoy bozoridagi eng kuchli raqobatchilari hisoblanadi.
