Finlyandiyaning Callboats kompaniyasi mustaqil harakatlanuvchi suv taksilarini taklif qiluvchi dunyodagi birinchi kompaniyaga aylandi. Elektr qayiqlar poytaxt Xelsinkini yaqin atrofdagi arxipelag bilan bog‘laydi. Quyosh batareyasida ishlovchi ushbu qayiqlar o‘zi mustaqil harakatlanishi uchun kameralar, sensorlar va sun’iy ong tizimlari bilan jihozlangan.
Qayiqlar 17 km/soat maksimal tezlikka erishadi va to‘qqiz soatgacha quvvatlanmasdan ishlay oladi. Avtonom suv transporti narxlarni keskin pasaytirish va kemalarni boshqaruvchi kapitanlar yetishmasligi muammosini hal qilish uchun mo‘ljallangan.
Bir yil davomida Callboats avtonom qayiqlarni odam boshqargan holda sinovdan o‘tkazgan. Endi kompaniya bir vaqtning o‘zida bir nechta qayiq uchun murakkab ssenariylarni masofadan turib boshqaradigan kapitanlar ko‘magida qayiqni avtonom tarzda qo‘llashga o‘tmoqda.
Kompaniya bosh direktorining so‘zlariga ko‘ra, arxipelagga tashuv narxining 60-70 foizi kapitanlarga to‘lanadigan haqqa to‘g‘ri keladi. Qayiq mustaqil harakatlanishi evaziga bir kishi beshta suv taksisini boshqarishi mumkin, bu esa qisqa mavsumlarda daromadning oshishiga va iste’molchilar uchun narxlarning pasayishiga olib keladi.
Amaldagi qoidalarga ko‘ra, ilk o‘zi boshqariladigan qayiqlar bortida kamida bir ekipaj a’zosi bo‘lishi talab etiladi. Ammo qayiqlar barcha ishlarni o‘zlari bajara olishi kerak.
Qayiqlar 10 kishiga mo‘ljallangan va 10 kVt quvvatga ega to‘rtta elektr moslamasi bilan jihozlangan. Standart 60 kVt-soat batareya 11 km/soat tezlikda taxminan to‘qqiz soat suzish imkonini beradi. Qayiq tomida 1,5 kVt quvvatga ega quyosh batareyasi o‘rnatilgan bo‘lib, u ochiq kunda akkumulatorni 8-10 kVt/soatga quvvatlantiradi. Qolgan quvvat uch fazali 11 kVt.li quvvatlovchi qurilma orqali olinadi.
Avtonom qayiqlar Xelsinki va Kotiluoto, Vilyaluoto va Malkasaari orollari orasida harakatlanadi. Bu kichik marshrutlar bo‘lib, ularning borish-kelish uzunligi taxminan uch kilometrni tashkil etadi.
