Xiaomi kompaniyasining MS11 elektr sedani Xitoydagi tezyurar yo‘llardan birida kameralar nigohiga tushdi.
Mashina Urumchi-Chanszi yo‘lida yuqori harorat sinovlaridan o‘tayotgan bo‘lgan. Guvohlar mashinaning bir nechta suratini kameraga muhrlab, Weibo ijtimoiy tarmog‘ida joylashtirishgan.
Qayd etish joiz, Xitoy kompaniyasi smartfonlar, aqlli qurilmalar va boshqa texnologiyalar sohasidagi ilg‘or mahsulotlari bilan anchadan beri mashhur. Endi kompaniya o‘z mijozlariga ekologik toza transport sohasida yanada ko‘proq imkoniyatlarni taqdim etish uchun elektromobillar sohasiga qo‘l urishga qaror qildi.
Suratlarda Xiaomi MS11 kamuflyaj ostida yashiringan bo‘lsa-da, uning shakli va bir nechta o‘ziga xos jihatlari, jumladan, old oyna ustidagi LiDAR datchigini ko‘rish mumkin.
Xiaomi'ning birinchi elektromobili haqida hozircha tafsilotlar ko‘p emas. Ma’lumotlarga ko‘ra, 101 kVt/soat quvvatga ega uch batareyali elektromobil to‘liq quvvatlanganda 800 km masofani bosib o‘tishiga va’da berilmoqda.
Mashina 2024-yilning birinchi yarmidan ishlab chiqarilishi kutilmoqda.
Avtomobilni yaratish ustidagi ishlar birmuncha vaqtdan beri olib borilmoqda. Goh-gohida avtomobilni ko‘chada sinovdan o‘tkazish vaqtida olingan fotosuratlar internetda paydo bo‘lib turadi. Bunday suratlardan elektromobil 19 duymli g‘ildiraklar bilan butlanishi, uning zaryadlovchi porti esa orqasining chap tomonida joylashishini ko‘rsa bo‘ladi.
Mashina narxiga kelsak, elektr sedan Tesla Model 3, BYD Seal, Deepal SL03 kabi gigantlar va Xitoyning boshqa elektr sedanlari bilan raqobatlashmoqchi. Bu esa avtomobilning narxi 200 000 yuan (27,5 ming dollar) atrofida bo‘lishidan darak beradi.
