Havaskor muhandis Jek Spiggl birinchi avloddagi 42 mmli Apple Watch “aqlli” soatini quvvatlash talab qilmaydigan oddiy soatga aylantirdi. Biroq rostini aytganda, u bunga erishish uchun original soatning deyarli barcha funksiyalaridan voz kechishiga to‘g‘ri kelgan.
Sodda qilib aytganda, u “aqlli” soatni siferblatli oddiy mexanik soatga aylantirib qo‘ya qolgan.
“Nega bunday qildim? Hammasi o‘tgan yil dekabrda Apple Watch sotib olganimdan keyin boshlandi. Men o‘shanda aslida menga kerak bo‘lmagan, katta ehtimollik bilan umuman ishlatilmaydigan, 5 yildan keyin esa qo‘llab-quvvatlash yo‘qligi yoki eskirgan detallari sababli befoydaga aylanadigan funksiyalar uchun 200 dollarga yaqin sarflashimni anglab yetdim. O‘shanda miyamga ushbu g‘oya keldi”, deb tushuntirgan Spiggl.
Muhandis Apple Watch’ni bo‘laklab, uning ichidagi barcha detallar: akkumulator, bosh plata va boshqa elektron qismlarini olib tashlagan. Biroq soat aslidagidan farq qilmasligi uchun uning asl oynasini qoldirgan va korpus ostiga Seiko NH38 modelidagi soatning mexanik blokini o‘rnatgan.
Natijada esa Apple Watch korpusida joylashgan mexanik soat hosil bo‘lgan. Shu tariqa, soatda hech qanday elektron qism qolmagani sababli uni quvvatlashga ham hojat qolmagan va uni oddiy mexanik murvat yordamida ishga tushirish mumkin.
Spiggl uning tajribasini qaytarmoqchi bo‘lganlar uchun smart-soatni oddiy soatga aylantirish bo‘yicha suratlar va videodan iborat yo‘riqnomani ham tuzgan.
