OSIRIS-REx zondi Bennugacha va ortga 6 milliard kilometrdan ziyodroq yo‘l bosib o‘tdi. Endi namunalar olimlar va kosmik agentliklar o‘rtasida taqsimlanadi, ammo uning 70 foizi o‘rganish uchun NASA'da qoladi.
Agentlik va AQSH harbiy-havo kuchlari guruhlari Yuta cho‘lidagi operatsiya davomida Bennu asteroidi namunalari bo‘lgan kapsulani muvaffaqiyatli topishdi. Shu tariqa, NASA birinchi marta asteroid namunasini qo‘lga kiritdi.
OSIRIS-REx Yerdan taxminan 101 000 km balandlikda namunalarni qaytarish uchun mo‘ljallangan kapsulani chiqargan. Kapsulaga qo‘nish vaqtida zarar yetmagan. U vertolyotga mahkamlanib, maxsus joyga olib ketilgan.
Kapsulada Bennudan olingan taxminan 250 gramm tosh bo‘laklari va boshqa materiallar mavjud. Kapsula Yer atmosferasidan o‘tish vaqtida 43 450 km/soat tezlikka erishgan va 2900 daraja haroratga bardosh bergan.
2016-yilda boshlangan 1 milliard dollarlik missiya davomida OSIRIS-REx 2018-yilda Bennuga yetib kelgan va 2020-yilda asteroid namunalarini yig‘ishga muvaffaq bo‘lgan.
NASA namunaning 70 foizini o‘zida olib qoladi va ko‘p yillar davomida ularni tahlil qiladi. Namunalarning yana 25 foizi 35 ta turli muassasaning 200 dan ortiq olimlari o‘rtasida taqsimlanadi, 4 foizi Kanada koinot agentligiga va yana 0,5 foizi Yaponiya Aerokosmik tadqiqotlar agentligiga (JAXA) beriladi.
OSIRIS-REx zondi endi OSIRIS-APEX deb nomlangan missiyani boshlaydi. Zond 2029-yilda Yer yaqinidan uchib o‘tadigan boshqa asteroid – Apofisga yo‘l oladi.
