Shamol energiyasini qushlar va kemalarga xalaqit qilmagan holda, ochiq dengizda olish maqbulroqdir. Buning uchun turli xil suzuvchi shamol turbinalari mavjud, biroq Touchwind kompaniyasi taklif qilayotgan konstruksiyani hali ko‘rmaganingiz aniq. Ushbu niderland kompaniyasi muhandislarining fikricha, aylanishni boshqarishning murakkab tizimlariga ega bo‘lmagan ikki parrakli turbina arzonroqdir va kamroq bo‘sh turadi.
Ilg‘or konstruksiya suv ostida zanjirlarda suzib yuruvchi katta bochka - buydan iborat. Ushbu bochkaga machta payvandlangan bo‘lib, uning boshqa uchida ikki parrakli katta o‘lchamli vint joylashgan. Bunday vint klassik uch qanotli vintdan taxminan 30 foiz arzonroq tushadi. U qimmatbaho sozlash tizimini talab qilmaydi va ko‘pgina standart turbinlardan farqli o‘laroq, shamol tezligi 90 km/soat dan yuqori bo‘lganda ham o‘chmaydi. Uning o‘chish chegarasi ancha yuqori - 250 km/soat. Turbina qancha kam ishsiz tursa, shunchalik ko‘p energiya ishlab chiqaradi.
Vint biroz qiya turgan machtaga mahkamlangan. Shamol tezligi past bo‘lganda, parraklar suv sirtidan uncha yuqori bo‘lmagan balandlikda aylanadi, lekin shamol kuchayganda, ular tezroq aylana boshlaydi va vertolyot kabi tortish kuchi hosil qiladi va machta tik holatga keladi. Parraklar tekisligi o‘zgargani sababli kuchli shamollar vintni yanada kuchli aylantira olmaydi. Biroq bu sodir bo‘lgudek bo‘lsa ham, buy suv sirtiga ko‘tarilib, balastga aylanadi va zanjirlarning uzilishiga yo‘l qo‘ymaydi.
Boshqa suzuvchi shamol turbinalari konstruksiyalarida bo‘lgani kabi, Touchwind shamol yo‘nalishiga bog‘liq bo‘lmaydi va optimal yo‘nalishni mustaqil tanlab, sirtda passiv tarzda suzadi.
Kompaniya ma’lumotlariga ko‘ra, bunday shamol generatorlarini 200 metr uzunlikdagi machtalarga xizmat ko‘rsata oladigan port dokida ishlab chiqarish mumkin. 12 MVt quvvatga ega turbinani buyi bilan birga tashib, belgilangan joyga o‘rnatish katta mehnat talab qilmaydi.
Kompaniya shamol turbinasining quruqlikdagi va dengizdagi kichraytirilgan prototiplarini sinovdan o‘tkazib bo‘lgan va hozirda Yaponiyaning Mitsui O.S.K. Lines kemachilik kompaniyasidan investitsiya olgandan so‘ng, 6 metr diametrli vintni sinovdan o‘tkazishni boshlaydi.
Avvalroq Equinor energetik giganti va uning hamkorlari dunyodagi eng yirik suzuvchi dengiz shamol stansiyasi Hywind Tampen'ni ochdi. U har biri 8,6 MVt quvvatga ega 280 metrli o‘n bitta turbinadan iborat. Stansiya Norvegiya qirg‘oqlaridan taxminan 140 km uzoqlikda joylashgan bo‘lib, bu hududda suv chuqurligi 300 metrga yetadi.
