2023-yilda ishlab chiqarilgan uchta eng yangi elektromobil — Hyundai Ioniq 6, Lexus RZ va Genesis Electrified GV70 AQSHning Avtomobil yo‘llarida xavfsizlikni sug‘urtalash institutining (IIHS) xavfsizlik uchun eng yuqori mukofoti — IIHS Top Safety Pick mukofotiga sazovor bo‘ldi. Ushbu avtomobillar bir qator krash-testlardan boshqa modellarga qaraganda yaxshiroq o‘tgan.
Mukofotni olish uchun IIHS'ning turli xil to‘qnashuvlardan iborat oltita testida, jumladan, tomning mustahkamligiga sinovda eng yuqori reyting olishi kerak. Shuningdek, u e’tiborsiz haydovchilarga piyodalar yoki boshqa transport vositalari ishtirokidagi avariyalarning oldini olishga yordam beruvchi “ilg‘or” yoki “a’lo” darajadagi to‘qnashuvlar oldini olish tizimiga ega bo‘lishi lozim.
Uchala avtomobil ham IIHS talablariga javob bergan. Jumladan, Electrified GV70 modeli piyodalar bilan to‘qnashuvning kunduzgi va tungi testlarida “ilg‘or” reytingini olgan bo‘lsa, Ioniq 6 va Lexus RZ “a’lo” darajaga baholangan.
Sinovlarda yana bir qancha elektromobillar, jumladan, Rivian R1T/R1S, Kia EV6, Hyundai IONIQ 5, Tesla Model 3/Y, Audi e-tron va boshqalar Top Safety Pick+ mukofotiga sazovor bo‘lgan.
IIHS AQSHda NHTSA bilan bir qatorda avtomobillar xavfsizligini baholash bo‘yicha asosiy tashkilotlardan biri hisoblanadi. Ularning farqi shundaki, NHTSA davlat agentligi bo‘lsa, IIHS sug‘urta kompaniyalari tomonidan moliyalashtiriladigan xususiy tashkilotdir. Yevropada ham bu borada o‘z reyting tashkiloti – Euro NCAP mavjud.
IIHS va NHTSA reytinglari o‘xshash maqsadlarga ega, biroq tashkilotlar turli xil sinov usullaridan foydalanadi va ba’zida ular oladigan natijalar bir-biridan farqlanadi. IIHS iste’molchilarga o‘z sinovlarida “yaxshi” yoki “Top Safety Pick” bahosini hamda davlat sinovlarida 4 yoki undan ortiq yulduz olgan transport vositalarini xarid qilishni tavsiya qiladi.
