Berlinda Yevropaning eng yirik xalqaro elektronika ko‘rgazmasi – Internationale Funkausstellung Berlin – IFA 2023 bo‘lib o‘tdi. Ko‘rgazma kutilayotgan yangi gadjetlardan tashqari, tashrif buyuruvchilarni antiqa qurilmalar – charm televizordan tortib, mushuk va itlar uchun fitnes-trekergacha bo‘lgan gadjetlar bilan hayratda qoldirdi. Quyida ushbu qurilmalarning eng qiziqarlilari keltirilgan.
1. Tecno kompaniyasining xameleon noutbuki
Xitoyning Tecno kompaniyasi ko‘rgazmaga Megabook S1 noutbukining maxsus versiyasi Photochromic Edition'ni olib keldi. Noutbuk korpusi quyosh yoki ultrabinafsha nurlar ta’sirida rangini o‘zgartirishi mumkin. Qurilmaning nur tushadigan joylarida oqish fonda quyuq kulrang tasvirlar paydo bo‘ladi.
2. "Qog‘oz" ekranli TCL smartfoni
TCL 40 NXTPAPER smartfonida ko‘p qatlamli ekran qoplamasidan foydalangan bo‘lib, u ekranda yarqirashlarni akslantirmaydi, zararli ko‘k nurlanishni filtrlaydi, barmoq izlari qolishiga yo‘l qo‘ymaydi hamda ko‘rinishi va qo‘l bilan tekkanda oddiy qog‘oz sirtiga o‘xshaydi.
Smartfon 2460x1080 pikselli 6,78 duymli IPS-ekran bilan jihozlangan. Qurilma MediaTek Helio G88 protsessori ostida ishlaydi. Smartfon 8 GB tezkor va 256 GB ichki xotira bilan ta’minlangan.
3. Meditatsiya kabinasi
Niderlandiyaning Sensiks kompaniyasi IFA 2023'da “meditatsiya kabinasini” ko‘rsatdi. Kabina turli texnologiyalar bilan to‘ldirilgan maxsus xona bo‘lib, uning yordamida dam olishingiz mumkin.
Qurilma telefon kabinasiga o‘xshashdi. Uning ichiga o‘tirish va quloqchinlari bo‘lgan to‘ldirilgan reallik AR-garniturasini kiyish lozim. Ushbu ajoyib kabina tashvishlarni unutishingiz uchun hamma narsani qiladi: u AR-garniturada sizni tinchlantiruvchi video ko‘rsatadi, haroratni sozlaydi, havoni namlaydi va "shamol" oqimlarini siz tomon yo‘naltiradi.
4. Charm televizor
Xitoyning HiSense kompaniyasi rassomlar xolsti ko‘rinishida ishlangan Art TV R7 televizorini namoyish qildi. Qurilmani yasashda metall yoki plastmassa o‘rniga matolar va haqiqiy charmdan foydalanilgan.
Aslida, bu “ikkisi birda” ko‘rinishidagi qurilma: u ham televizor, ham surat vazifasini bajaradi. Televizorni umuman o‘chirmasligingiz mumkin – u kutish rejimida mashhur rassomlarning suratlarini namoyish etadi, tunda esa foydalanuvchini bezovta qilmaslik uchun butunlay o‘chadi.
5. Suv bilan sovutiladigan dunyodagi eng kichik shaxsiy kompyuter
Tecno ko‘rgazmada yana bir yangi mahsulot – o‘lchamlari atigi 249x132x132 mm bo‘lgan MegaMini Gaming G1 mini-kompyuterini taqdim etdi. Qurilmaning e’tibor tortuvchi jihati shundaki, u ixcham korpusda joylashgan ikkita issiqlik trubkasidan tashkil topgan suv bilan sovutish tizimiga ega.
Mini-kompyuter Intel va AMD protsessorlari bilan jihozlangan versiyalarda ishlab chiqariladi. Qurilmaning Intel versiyasi 13-avloddagi i9 13900H protsessori va GeForce RTX 4050 grafik kartasi bilan, AMD versiyasi esa Ryzen R7−7840HS protsessori va AMD 7600MXT grafik kartasi bilan jihozlangan.
6. Mushuklar va itlar uchun fitnes-treker
Dolittle'ning taqiluvchi qurilmasi odamlar uchun standart fitnes-trekerga o‘xshaydi, ammo mushuk va itlarga mo‘ljallangan. U hayvonning panja yoki bo‘yniga emas, balki tanasiga taqiladi.
Qurilmada o‘rnatilgan sensorlar uy hayvonlarining yurak urish tezligini, nafas olishini va boshqa ma’lumotlarni o‘qiydi. Barcha ma’lumotlar real vaqt rejimida mobil ilovada ko‘rsatiladi.
7. LG kompaniyasining “chamadon televizori”
LG StanbyME Go portativ multimedia tizimi tom ma’noda o‘rtacha o‘lchamdagi chamadon ichiga sig‘adi. Og‘irligi bor-yo‘g‘i 13 kg bo‘lgan gadjetni istalgan joyga o‘zingiz bilan olib ketishingiz mumkin. Qurilmaning o‘ziga xosligi shundaki, 27 duymli sensorli ekranni 90 gradusgacha burchak ostida gorizontal yoki vertikal holatga bursa bo‘ladi.
Full HD ko‘rsatish qobiliyatiga ega sensorli IPS-displey yorqin va kontrastli tasvirlar ko‘rsatishni ta’minlaydi. "Chamadon" ichida 20 Vt.li ikkita 4 duymli stereo dinamik ham mavjud.
Qurilmaning akkumulatori unga 3 soat davomida beto‘xtov ishlashni ta’minlaydi.
8. Ekrani o‘raluvchi Tecno smartfoni
Tecno Phantom Ultimate - xitoylik ishlab chiqaruvchilarning smartfonlar uchun g‘ayrioddiy narsalarni o‘ylab topishga yana bir urinishi hisoblanadi. Qurilmaning ekranini dumaloq o‘ram kabi ochib-yig‘ish mumkin. Bunda ekran 6,55 duymdan 7,11 duymgacha kengayishi mumkin. Displeyni kengaytirish va yig‘ish uchun 1,2 soniya kifoya qiladi. Buning uchun qurilmaning yon tomonidagi maxsus tugmani bosish yetarli.
9. Quloqlari kichik odamlar uchun quloqchinlar
JBuds Mini quloqchinlari o‘zining kichik o‘lchamlari bilan ajralib turadi, u Apple AirPods va shunga o‘xshash quloqchinlardan taxminan 30 foizga kichikroq. Kompaniya qurilmani yaratishda biror-bir sababga ko‘ra standart quloqchinlardan foydalana olmaydigan odamlar ehtiyojlarini inobatga olgan.
Ushbu quloqchinlar shimning cho‘ntagiga sig‘adigan qilib loyihalangan. Qurilma korpusidagi maxsus halqa uni kalitlar bilan birga brelokda olib yurish imkonini beradi. Yangi mahsulot narxi 40 dollar turadi.
10. "Muloqot qiluvchi" lampa
Uylar uchun “aqlli” qurilmalar ishlab chiqaruvchi Aqara ko‘rgazmada nafaqat xonani yorituvchi, balki uyda yashovchilarga bildirishlar yubora oluvchi lampa taqdim etdi.
Maxsus dastur yordamida lampadan foydalanishning turli rejimlarini sozlash mumkin: masalan, agar kirish eshigi ochilsa, gaz yoki suv sizib chiqayotgani aniqlansa, kuzatuv kamerasi uyda begona odamni qayd qilsa, lampa yorug‘lik indikatsiyasini yoqishi mumkin.
