Butun dunyodagi foydalanuvchilar Xiaomi smartfonlaridan shikoyat qila boshladilar. Gap shundaki, smartfonlarda Telegram messenjerini yuklab olish mumkin, biroq MIUI proshivkasi uni o‘rnatishga ruxsat bermayapti.
Ma‘lum qilinishicha, MIUI tomonidan shunga o‘xshash cheklovlar 2022-yilda ham uchragan. O‘shanda Xiaomi Xitoyda nomaqbul dasturlarni bloklashni boshlagan. Kompaniya ixlosmandlari uni bunday senzura vositasiga ega bo‘lgani uchun tanqid ostiga olishgan.
Xuddi shunday holat Telegram bilan ham yuz berdi. Xitoyda messenjer bloklangan va undan mamlakat ichida foydalanmagan ma’qul. Ko‘rinishidan, Xiaomi o‘z foydalanuvchilarini “taqiqlangan meva”dan himoya qilishga harakat qilmoqda, ammo hamma ham bunday “g‘amxo‘rlik”ni qo‘llab-quvvatlamayapti.
Shunisi ma’lumki, Telegram smartfonlarning faqat xitoycha versiyalarida bloklanmoqda. Kompaniyaning Rossiya, Osiyo va Yevropa Ittifoqi bozori uchun mo‘ljallangan qurilmalarida barcha ilovalarni muammosiz o‘rnatish mumkin. Shu munosabat bilan mutaxassislar Xiaomi qurilmalarini sotib olishdan oldin ularning versiyalarini tekshirishni tavsiya qilishmoqda. Ayniqsa, qurilmalarni AliExpress va boshqa onlayn platformalardan xarid qilishda sergak bo‘lish lozim.
