AQSHning Shift Robotics kompaniyasi yurish tezligini odatdagidan 250 foizga tezlashtiradigan Moonwalkers nomli qurilma ixtiro qildi.
Qurilma rolikli sandallarga o‘xshaydi va muvozanatni yo‘qotmasligingizni ta’minlaydi.
Sun’iy intellekt asosida ishlovchi sandallar oyoqdagi poyabzal ustidan kiyiladi va 11 km/soatgacha tezlikka erishish imkonini beradi.
Tasavvur qiling-a, xuddi harakatlanayotgan piyodalar yo‘lagida turgandek tezda do‘konlar bo‘ylab xaridlarni amalga oshirishingiz yoki itingizni sayr qildirishingiz mumkin.
Mashinaviy o‘rganish algoritmlari tufayli sandallar faqat harakatlanayotganingizda ishlaydi: ular sizga kerak bo‘lganda to‘xtaydi, zinalardan ko‘tarilish yoki tushish vaqtida g‘ildiraklarni bloklaydi va pastga tushish vaqtida tezlikni avtomatik sozlaydi.
Aytaylik, siz avtobusga chiqmoqchisiz: elektron tormoz sandallar g‘ildiraklarini bloklashi uchun o‘ng tovoningizni ko‘tarib, yerga tushirasiz.
Yurish rejimiga qaytish uchun bloklashdan chiqishingiz lozim, buning uchun o‘ng tovoningizni ko‘tarib, oyoq uchini yerdan uzmagan holda uni soat yo‘nalishi bo‘yicha aylantirishingiz kifoya qiladi.
Kompaniya asoschisi va bosh direktori Syunsze Chjanning aytishicha, u elektr skuterda ishga ketayotganda falokatga uchrashiga bir baxya qolgandan so‘ng bu g‘oyaga kelgan.
Chjan Karnegi-Mellon robototexnika institutining reaktiv dvigatellar bo‘yicha muhandislari, robototexniklar va krossovkalar dizaynerlari jamoasi bilan birgalikda so‘nggi besh yil davomida "tana imkoniyatlariga tayanuvchi" dunyodagi eng tez poyabzalni yaratishga harakat qilgan.
Shift Robotics'da ta’kidlanishicha, roliklarda uchishdan farqli o‘laroq, yangi sandallar hech qanday maxsus ko‘nikmalarni talab qilmaydi. Sandallar sun’iy intellekti har bir foydalanuvchining yurish uslubiga moslashadi va algoritmlarga uni saqlab qolish uchun 10 qadam tashlash yetadi.
Sandallar poyabzalga magnit qisqich yordamida mahkamlanadi, ularni qurilma ishlamay qolganda osongina yechish mumkin.
Poyabzal sinovlarida 15 yoshdan 60 yoshgacha bo‘lgan odamlar ishtirok etgan. Chjanning aytishicha, ishtirokchilarning aksariyati sandallarni kiygandan 10-15 daqiqa o‘tib, ularda ancha bemalol yurishga muvaffaq bo‘lishgan.
Antiqa sandallar hozircha faqat AQSHda 1399 dollardan sotilmoqda.
