Hindiston 2-sentyabrda Quyosh tomon “Aditya-L1” tadqiqot stansiyasini uchirdi. Stansiya Shrixarikota kosmodromidan uchirilgan.
“Aditya-L1” Hindistonning ilk fazoviy observatoriyasi hisoblanib, Quyosh tomon Yerdan 1,5 million kilometr uzoqlikkacha boradi. Mutaxassislarning fikricha, kema belgilangan yerga taxminan 2024-yilning yanvarida yetadi.
Stansiya Quyoshni masofadan o‘rganadi. Misol uchun, u Quyoshning tashqi qatlamlarini tahlil qiladi, quyosh shamoli oqimlari, chaqnashlari, magnit bo‘ronlari va uning boshqa faolligini o‘rganadi. Yig‘ilgan ma’lumotlar olimlarga Quyoshning sayyoramizga ta’sirini yanada yaxshiroq tushunishga yordam beradi.
Missiyaning asosiy maqsadi Quyosh tojini o‘rganishdan iborat. NASA agentligi ma’lumotlariga ko‘ra, Quyosh toji harorati 1,1 million gradusni tashkil qiladi, bu uning sirtidan taxminan 200 marta issiqroqdir.
Yaqinda Hindiston Oyga o‘z kemasini qo‘ndira olgan to‘rtinchi davlatga aylangandi. Avgust oyi oxirida “Chandrayaan-3” fazoviy kemasi Oyga uchib, tarixda birinchi marta uning janubiy qutbiga qo‘ndi. Hindistondan oldin Oyga faqat 3 davlat – AQSH, Xitoy va sobiq ittifoq o‘z qurilmasini qo‘ndira olgan.
