Seul milliy universiteti olimlari noyob robotlar yaratishdi. Ular ipak qurti kabi harakatlanib, so‘ngra izsiz erib ketishi mumkin. Bu “Terminator 2” filmidagi suyuq robotni eslatib yuboradi.
Antiqa robotlar silikon qatron va ultrabinafsha nurlar ta’sirida ftorid ionlarini ishlab chiqaruvchi maxsus plyonkadan iborat. Oddiy rejimda robot zich, ammo yopishqoq holatda bo‘ladi. U sudralib yurib, kichik tirqishlarga ham kira oladi.
Robot o‘z vazifalarini yakunlagach, operator bittagina tugmani bosishi orqali ularni yo‘q qilib yubora oladi. Bunda ultrabinafsha diodlari yoqilib, robotni parchalanishga majbur qiladi. U ikki soatdan kamroq vaqt ichida erib ketib, o‘z ortidan yerga tez singib ketadigan yog‘li suyuqliknigina qoldiradi.
Ta’kidlanishicha, o‘z-o‘zini yo‘q qilish funksiyasiga ega bunday robotlardan razvedkada foydalanish mumkin. Robot barcha kerakli ma’lumotlarni to‘plagach, razvedkachilar uni yo‘q qilib yuborish uchun bitta tugmani bosishlari yetarli bo‘ladi. Shu tariqa maxfiy ma’lumotlarning begona shaxslar qo‘liga o‘tib ketishi xavfi minimallashtiriladi.
Bundan tashqari, robotlardan xavfli joylarda qidiruv operatsiyalarini amalga oshirishda foydalanish mumkin. Vazifa bajarilgach, robot odamlarga xavf tug‘dirmasdan yo‘q qilib yuboriladi.
