Dunyodagi eng katta dengiz shamol turbinasi Goldwind GWH252-16MW bitta shamol turbinasi 24 soat ichida energiya ishlab chiqarishi bo‘yicha yangi jahon rekordini o‘rnatdi. U to‘fon paytida 384,1 MVt-soat elektr energiya ishlab chiqargan, bu miqdor 170 ming uyni elektr bilan ta’minlashga yetadi.
«Aqlli» shamol turbinasi rotorining diametri 252 metrni tashkil qiladi. U aylanganda 50 000 kvadrat metr maydonni qamrab oladi - bu esa yettita standart futbol maydoniga teng. Turbina ustuni balandligi 146 metrga yetadi, bu 50 qavatli bino deganidir.
Shamol turbinasi 2023-yil iyun oyida Xitoyning janubi-sharqidagi Futszyan provinsiyasidagi Zhangpu Liuao Phase 2 dengiz shamol stansiyasida o‘rnatilgan va 19-iyulda ishga tushirilgan. Stansiya qurilishini China Three Gorges (CTG) davlat energetika kompaniyasi amalga oshirmoqda.
1-sentabr kuni shamol turbinasi “Xaykuy” to‘foni vaqtida tezligi 85 km/soat va maksimal tezligi 23,56 m/s.ni tashkil qilgan shamolga to‘qnash keldi. U shu vaqtda 24 soat ichida 384,1 MVt-soat elektr energiyasi ishlab chiqargan.
An’anaviy shamol turbinalari shamol tezligi 25 m/s.dan oshganda ortiqcha yuklanishning oldini olish uchun parraklarini avtomatik ravishda bloklab qo‘ysa, bu «aqlli» qurilma o‘z parraklarini real vaqtda sozlay oladi va elektr energiyasini ishlab chiqarishni davom ettiradi.
