Xitoyning Tecno kompaniyasi ekrani o‘raluvchi konseptual smartfoni Phantom Ultimate'ni namoyish etdi. Yangi gadjet Berlinda 1-5 sentabrda o‘tadigan IFA 2023 ko‘rgazmasiga olib kelinishi mumkin.
Yangi qurilmada eng hayratlanarlisi shundaki, uning ekrani rulon kabi yig‘ilib-ochilishi mumkin. Bunda displey 6,55 duymdan 7,11 duymgacha kengayishi mumkin. Buning uchun bor-yo‘g‘i 1,2 soniya kerak bo‘ladi. Displey o‘lchamini o‘zgartirish uchun qurilmaning yon tomonidagi maxsus tugmani bosish kifoya.
Qurilma 6,55 duymli ekran rejimiga o‘tganda, displeyning bir qismi korpusga kirmaydi. Natijada, smartfonning orqa tomonida ekranning ensiz bir qismi qoladi, u Always On Display funksiyasini bajaradi. Unda vaqt, bildirishnomalar va asosiy kamerada selfi olish uchun mini-ekran aks etadi.
Kompaniya yig‘iluvchi displeyning ba’zi ko‘rsatkichlarini oshkor qildi. U o‘zidan 2296x1596 pikselli 7,11 duymli LTPO AMOLED-panelini aks ettiradi.
Smartfonning qalinligi 9,93 mm.ni tashkil qiladi. Kompaniyada ta’kidlanishicha, qurilmani bir qo‘l bilan ham osongina boshqarish mumkin – uning orqa paneli yaxshiroq ushlanishi uchun maxsus qoplamaga ega.
Kompaniya Phantom Ultimate'ni IFA 2023 xalqaro elektronika ko‘rgazmasiga olib kelishi kutilmoqda. Ehtimol, kompaniya ko‘rgazmada o‘z qurilmasining barcha jihatlari bilan o‘rtoqlashadi. Gadjetning sotuvga chiqarilishi borasida hozircha hech qanday ma’lumot yo‘q.
