Avgust oyi tarvuz va boshqa mevalarning ayni yetilgan vaqti hisoblanadi. Ammo, afsuski, mavsumning eng qizg‘in pallasida ham hamma tarvuz shirinligi bilan “maqtana olmaydi”. Quyida sizga smartfon yordamida pishgan tarvuzni tanlash yo‘llari haqida so‘zlaymiz.
Tarvuzning pishganini qanday aniqlash mumkin
Shirin tarvuzni tanlashning ko‘plab usullari mavjud. Tajribali xaridorlar tarvuz dumiga e’tibor berishni tavsiya qiladilar. Pishgan tarvuzning dumi qurigan bo‘ladi.
Tarvuzning ayni yetilganini boshqa tashqi belgilar bo‘yicha ham aniqlash mumkin. Bundan tashqari, tarvuzning yetarlicha pishganidan uning yerga tegib turuvchi qismidagi dog‘i ham darak beradi. U qanchalik yaqqol bo‘lsa, tarvuz shunchalik shirin bo‘ladi.
Shirin tarvuz unga chertib ko‘rganda tebranishga o‘xshash ovoz chiqarishi kerak. Mutaxassislarning fikricha, chertganda jarangdor ovoz chiqishi mevaning pishib o‘tib ketganini ko‘rsatishi mumkin. Juda past ovoz, aksincha, uning hali yetilmaganidan darak beradi.
Aynan shu xususiyatni ko‘plab dasturchilar smartfonlar uchun tarvuzning yetilganini aniqlaydigan mobil ilovalarni ishlab chiqishda asos qilib oldilar. Agar siz pishgan tarvuzni qulog‘ingiz bilan aniqlashda hali yetarlicha tajribaga ega bo‘lmasangiz, unda siz ushbu dasturlardan birini sinab ko‘rishingiz mumkin.
Smartfon yordamida shirin tarvuzni qanday tanlash mumkin
Watermelon Prober ilovasi smartfoningiz mikrofoni yordamida tarvuzning pishganligini ovoz orqali tekshirish imkonini beradi.
Tarvuzning shirin-shirinmasligini tekshirish uchun siz uning o‘lchamini tanlashingiz, smatrfonni uning yaqiniga qo‘yishingiz va boshqa tomonidan 3 marta chertib ko‘rishingiz kerak. Ilova ovozning kuchiga qarab, tarvuzning pishganligini aniqlaydi va smartfon ekranida test natijalarini ko‘rsatadi.
Tarvuzning pishganini ovoz bo‘yicha aniqlay oladigan yana bitta dastur Melony: World First Watermelon Ripeness bo‘lib, u tarvuzga chertganda chiqadigan ovozning chastotasini tahlil qilib, uning yetilgan-yetilmaganini aniqlaydi.
Shunday dastur iPhone foydalanuvchilari uchun AppStore dasturlar do‘konida ham bor.
Спелый арбуз Free ilovasi tarvuzning yetilganini vazni, bo‘yi va eni bo‘yicha aylanasi uzunligiga ko‘ra aniqlashga yordam beradi.
Buning uchun tarvuz aylanasini o‘lchov tasmasi yoki ip yordamida o‘lchash hamda ekrandagi tegishli maydonlarga olingan ma’lumotlarni kiritish kifoya qiladi. Dasturdagi algoritmlar tarvuzning bo‘yi va eni bo‘yicha aylanalar uzunligi nisbatlarining to‘g‘riligini hisoblab chiqadi, natijalar esa darhol smartfoningiz ekranida ko‘rsatiladi.
Albatta, siz bunday usullarga ko‘r-ko‘rona ishonmasligingiz va ularga jiddiy yondashmasligingiz kerak, chunki bunday ilovalarni ishlab chiquvchilarning aksariyati ko‘ngilochar maqsadlardan boshqa narsani ko‘zlaganlari dargumon. Biroq, kelajakda tarvuzlarning yetilganini gadjetlar yordamida tekshirishning shubhasiz yanada ilg‘or usullari paydo bo‘ladi. Ammo hozircha ulardan faqat qo‘shimcha chora sifatida foydalanishni tavsiya qilamiz va iloji bo‘lsa, shirin tarvuzni tanlashda o‘z ko‘zingiz va quloqlaringizga ishonganingiz ma’qul.
