Xitoy startapi tanani sovitish uchun QOOLA Pro ixcham konditsionerini taqdim etdi. Bu qurilma ko‘p terlaydigan va issiqlikka chidamsiz odamlar uchun haqiqiy haloskor bo‘lishi kutilmoqda.
Qurilmani tananing istalgan qismiga – qo‘llar, oyoqlar, bel va hattoki yuzga mahkamlash mumkin. Buning uchun konditsionerda uzunligini sozlash mumkin bo‘lgan maxsus tasma mavjud. Qurilma ishlab chiquvchilari uni belga joylashtirishni tavsiya qilmoqdalar, bu holda salqin havo butun tana bo‘ylab aylanadi.
Gadjetning og‘irligi atigi 190 grammni tashkil qiladi, shu sabab u noqulaylik tug‘dirmaydi.
Qurilmada haroratni 12 °C dan 21 °C gacha o‘rnatish mumkin. Ta’kidlanishicha, qurilma tanani sovitishni boshlashi uchun atigi 30 soniya yetarli bo‘ladi. Qurilma to‘liq zaryadlangan holatda 8 soatgacha ishlaydi. Unda USB-C orqali quvvatlanuvchi akkumulyator bor.
QOOLA Pro‘da tashqi haroratga qarab uning quvvatini avtomatik o‘zgartira oladigan sun’iy ong rejimi mavjud. Muhandislar qurilmani smartfondan boshqarishga imkon beradigan maxsus mobil ilovani ham yaratishgan.
QOOLA Pro‘ga KickStarter platformasida 69 dollar narx bilan buyurtma berish mumkin. Qurilmaning mijozlarga yetkazilishi noyabr oyidan boshlanadi. Kelajakda mini-konditsioner AliExpress'da paydo bo‘lishi kutilmoqda.
