Xitoyning HiSense kompaniyasi Berlinda o‘tayotgan IFA 2023 ko‘rgazmasida noodatiy televizor Art TV R7'ni namoyish etdi. Ajablanarlisi, qurilma Solbiati to‘qimachilik fabrikasi bilan hamkorlikda yaratilgan.
Gap shundaki, HiSense Art TV R7 rassomlar xolsti shaklida ishlangan. Qurilmaning qirralari ham tekis bo‘lmay, piramida shaklida. Undan ham hayratlanarlisi, televizorni ishlab chiqarishda metall yoki plastmassa o‘rniga mato va charmdan foydalanilgan.
Kompaniya Art TV R7'ni televizordan ko‘ra xolstga o‘xshash qilishga harakat qilgan. Qurilmani stolga qo‘yish yoki rassom molberti ko‘rinishidagi taglikka o‘rnatish mumkin.
Televizorni umuman o‘chirmasa ham bo‘ladi – u uyqu rejimida mashhur rassomlarning suratlarini namoyish etadi. Tunda esa foydalanuvchini bezovta qilmaslik uchun to‘liq o‘chadi. Sodda qilib aytganda, bu ham televizor, ham suratdir. Bundan tashqari, u ishlamagan vaqtida katta siferblatli soat vazifasini ham bajarishi mumkin.
Qurilma 55 duymli 4K-ekran hamda 24 Vtli audiotizim bilan jihozlangan.
Antiqa televizorni 15 sentabrdan boshlab Xitoy va Yevropada sotib olish mumkin bo‘ladi. Uning narxi hozircha ma’lum qilinmagan.
