Fransiyaning Euro Airship kompaniyasi Solar Airship One dirijabl konseptini taqdim etdi. Bu ekologik toza havo kemasi bo‘lib, uning qurilishi 2024-yilda boshlanadi.
Dirijabl ekologik toza materiallardan ishlab chiqariladi va yoqilg‘i o‘rniga elektr energiyasi hamda vodorod ishlatiladi. Samolyotning havoga ko‘tarilishi 2026-yilga mo‘ljallangan.
Solar Airship One’da butun dunyo bo‘ylab sayohat qilish mumkin bo‘ladi. U sayyoramizni 20-30 kun ichida aylanib o‘ta oladi. Qurilmaning tepasida 4800 kvadrat metr maydonga ega quyosh panellari mavjud. Ular batareyalarni kun davomida quvvatlaydi. Kechasi esa vodorod dvigatellari ishga tushadi. Buning evaziga dirijabl "cheksiz" uchishi mumkin va faqat favqulodda vaziyatlardagina yerga qo‘nadi.
Dirijabl yo‘lovchilari ajoyib manzaralardan bahramand bo‘lishadi.
Solar Airship One'ning uzunligi 151 metrni, shar hajmi esa 50 ming kub metrni tashkil qiladi. Dirijabl ichida 15 ta gaz bo‘linmasi o‘rnatiladi va ular neyrotarmoq orqali boshqariladi – sun’iy ong shamol va boshqa meteorologik sharoitlarga qarab barcha kerakli sozlamalarni bir zumda o‘rnatadi.
Euro Airship vakillari dirijablning yo‘nalish xaritasini hozircha oshkor qilishmagan.
Dirijabl 350 km/soat tezlikka erisha oladi, bu esa unga taxminan bir oy ichida butun sayyora bo‘ylab parvoz qilish imkonini beradi. O‘rtacha parvoz balandligi 6000 metrni tashkil qiladi. Dirijablni qo‘ndirish uchun aeroportlar talab qilinmaydi, buning uchun kichik tekis maydon kifoya qiladi.
Havo kemasi ichi qanday ko‘rinishda bo‘lishi, unda dunyo bo‘ylab sayohat narxi qancha turishi hozircha noma’lum.
