Myunxen texnika universiteti talabalari elektromobil bir quvvatlanishda rekord uzunlikdagi masofani bosib o‘tishiga erishishdi. Ularning kichik o‘lchamli avtomobili muc22 atigi 15,5 kVt-soat sig‘imli akkumulatorda hazilakam bo‘lmagan masofa – 2574 kilometr yo‘l bosib o‘tdi. Bunga avtomobilning samarali dizayni va yengil vazni tufayli erishildi.
Myunxen aeroportida o‘tkazilgan olti kunlik sinovlar davomida avtomobil bir to‘liq quvvatlanishda quyosh batareyasi bo‘lmagan elektromobillar uchun yangi masofa rekordini o‘rnatdi.
Elektromobilning maksimal tezligi soatiga atigi 42 km.ni, og‘irligi esa haydovchisiz 170 kg.ni tashkil qiladi.
Rekord urinish ob-havoning natijaga ta’sirini bartaraf etish maqsadida Myunxen aeroportidagi bo‘sh angarda bo‘lib o‘tgan. Bu boradagi avvalgi rekord 1609 km.ni tashkil qilgan. Yetti haydovchidan iborat jamoa bu masofaga bor-yo‘g‘i to‘rt kundan keyin erishgan va akkumulator hali to‘liq quvvatsizlanmagani uchun mashina o‘z harakatini davom ettirgan.
Bosib o‘tilgan yakuniy masofa esa mavjud rekordga nisbatan 60 foizga ko‘proqni tashkil qilgan. Bunda 100 km masofa uchun atigi 0,6 kVt-soat elektr iste’mol qilingan, bu esa bir gallon (3,8 litr) benzin bilan 6139 km masofani bosib o‘tishga tengdir.
Taqqoslash uchun shuni aytish mumkinki, bugungi kunda sotuvga chiqarilgan eng samarali elektromobillar Hyundai Ioniq 6 va Lucid Air modellari bo‘lib, ularning har biri 100 km uchun 14,8 kVt/soat quvvat sarflaydigan versiyalarga ega.
Bu ko‘rsatkichlar seriyali ishlab chiqariluvchi elektromobillar uchun yaqin kelajakda yaxshilanishi kutilmoqda.
