Xitoyning SHARGE kompaniyasi sovutish funksiyasiga ega portativ MagSafe akkumulatori ICEMAG Power Bank'ni taqdim etdi. Paverbank shaffof korpus hamda turli ranglarda jilolanuvchi yoritgichga ega. Kompaniyada ta’kidlanishicha, ICEMAG Power Bank dunyodagi birinchi shunday qurilma hisoblanadi.
Aksessuarning asosiy vazifasi smartfonni zaryadlashdan iborat. U 10000 mA/soat sig‘imga ega batareya bilan jihozlangan. Bu iPhone'ni o‘rtacha 2,5 marta to‘liq quvvatlantirishga yetadi. Uni ayfonga MagSafe magniti (iPhone 12 yoki undan keyingi versiyalarni talab qiladi) yoki USB-C kabeli orqali ulash mumkin. Birinchi holatda, zaryadlash quvvati 7,5 Vt, ikkinchisida 20 Vt bo‘ladi.
Qurilma zaryadlash vaqtida iPhone korpusini sovutishi mumkin. Buning uchun aksessuarni MagSafe orqali telefonga mahkamlash kifoya. Bunda qurilmaning ventilyatori yoqiladi va daqiqasiga 8000 ta aylanish tezligida paverbank korpusidagi teshiklar orqali issiq havoni yoyib yuboradi. Ishlab chiqaruvchi aksessuar yordamida iPhone'ni issiq kunda ham bexavotir quvvatlash mumkinligini va smartfonning qizib ketgan korpusi sababli qo‘llar kuymasligini ta’kidlab o‘tgan.
Qurilmaning ventilyatori va boshqa ichki qismlari aksessuarning old paneli shaffof plastikdan ishlangani sababli ko‘rinib turadi. Qurilma atrofi zaryadlash vaqtida turli ranglarda yonib turadigan yorug‘lik diodlari bilan o‘ralgan.
Paverbank kompaniyaning rasmiy saytida 60 dollardan sotilmoqda. Tez orada uni AliExpress'da ham buyurtirish mumkin bo‘ladi.
