BYD avtomobil brendi Xitoyda suv to‘siqlari orqali suzishga qodir va 1197 ot kuchiga ega gibrid YangWang U8 EREV yo‘ltanalamasini taqdim etdi. Avtomobil ilg‘or texnologiyalar va xavfsizlik tizimlari bilan jihozlangan. Mashina tabiiy ofatlar xavfi yuqori bo‘lgan hududlar uchun inqilobiy yechimga aylanishi mumkin.
Yo‘ltanlamas to‘liq privodli, umumiy quvvati 880 kVt bo‘lgan 4 ta elektr motorga va turgan joyida 360° ga burilish imkoniyatiga ega. Bundan tashqari, u suvda suzishi mumkin, bu esa favqulodda vaziyatlarda yo‘lovchilar uchun qo‘shimcha xavfsizlikni ta’minlaydi. Mashina tabiiy ofatlarga moyil hududlarda foydalanish uchun mo‘ljallangan.
Gibridning maksimal tezligi 200 km/soatni, 100 km/soatgacha tezlashishi esa 3,6 soniyani tashkil qiladi. Avtomobilni 18 daqiqada 30 foizdan 80 foizgacha quvvatlash mumkin.
Avtomobil chuqurligi 1 metrgacha, Off-Road Master Edition versiyasi esa 1,4 metrgacha chuqurlikka ega bo‘lgan suv to‘siqlarini yengib o‘tishga qodir. Havo to‘plagichning asosiy vazifasi 49,05 kVt-soat sig‘imli batareyani quvvatlovchi 2 litrli turbodvigatelga suv kirishining oldini olishdan iborat. 75 litrli gaz baki mashinaga 1000 km masofani bosib o‘tishni ta’minlaydi.
Mashinada suvdan kechib o‘tish uchun "yaxta rejimi" ham mavjud: agar g‘ildiraklar suv tubiga tegmasa, mashina avtomatik ravishda ushbu rejimga o‘tadi. U g‘ildiraklarini tortadi, dvigatelni o‘chiradi va favqulodda chiqish lyukini ochadi. Ushbu rejimda avtomobil 30 daqiqa davomida suzishi mumkin, ya’ni g‘ildiraklarini soatiga 3 km tezlikda aylantirib, taxminan 1,5 km masofani bosib o‘ta oladi. Kompaniyaning ta’kidlashicha, "yaxta rejimi" ermak uchun emas, balki favqulodda vaziyatlar uchun mo‘ljallangan.
Gibridning boshlang‘ich versiyasi narxi 1 089 000 yuan (taxminan 150 ming dollar)ni tashkil qiladi. BYD 2024-yilda mashinaning to‘liq elektr versiyasini chiqarishni rejalashtirmoqda.
