Massachusets texnologiya instituti tadqiqotchilari BrightMarker deb nomlangan markerlash tizimini ishlab chiqishdi. U o‘zidan faqat infraqizil nur ostida ko‘rinadigan teglarni aks ettiradi. Bu tizim koronavirus pandemiyasi davrida keng tarqalgan QR-kodlarga nisbatan xavfsizroqdir.
Qora va oq kvadratchalardan iborat QR-kodlar, albatta, turmushni yengillashtiradi, lekin ularni xavfsizlik nuqtai nazaridan ishonchli deb bo‘lmaydi. Masalan, xakerlar ularga zararli dasturlarga havolalar joylashtirishi mumkin. QR-kodlar firibgarlik uchun ham qo‘llanishi mumkin. Yangi ko‘rinmas BrightMarker teglari bilan bu muammolarning barchasi o‘z dolzarbligini yo‘qotadi. Ular oddiy QR-kodlar kabi ishlaydi, faqat infraqizil kamera ostidagina ko‘rinadi.
Texnologiya bunday yorliqlarni obyektni yaratish jarayonida bevosita uning o‘ziga joylashtirishni nazarda tutadi - buning uchun fluoressent materialdan tayyorlangan maxsus tolalar qo‘llanadi. Yorliqlar obyektning xususiyatlariga va uning funksionalligiga ta’sir ko‘rsatmaydi. Ularni aniqlash uchun smartfonlar yoki virtual reallik garnituralari bilan birgalikda qo‘llash mumkin bo‘lgan bir nechta aksessuar ishlab chiqilgan.
BrightMarker texnologiyasi bir nechta sohalarda o‘z tatbig‘ini topishi mumkin. Ko‘rinmas yorliqlar yordamida obyektlarning aslligini tasdiqlash va ularning harakatlanish yo‘lini kuzatish mumkin. Bundan tashqari, ular oddiy QR-kodlar bilan bir xil vazifalarni bajaradi. Tizimning yagona kamchiligi shundaki, u faqat 3D bosma jarayonida yaratiladigan obyektlarga joylashtirilishi mumkin, bu esa ulardan foydalanish ko‘lamini sezilarli darajada toraytiradi.
