Siam ko‘rfazidagi suv yashil rangga kirib, undan o‘t va chirigan baliq hidi anqiy boshladi. Mutaxassislarning fikriga ko‘ra, bu planktonning faol ko‘payishi alomati hisoblanadi.
Ushbu bir hujayrali organizmlar ba’zi dengiz jonzotlari uchun ozuqa hisoblansa-da, ularning ko‘p miqdorda bo‘lishi zararli hisoblanadi.
Fitoplanktonning ko‘payishi suvosti dunyosiga salbiy ta’sir ko‘rsatadi. Masalan, bu jarayon tabiiy oziqa zanjirida, shuningdek, baliqchilikda muammolar keltirib chiqaradi.
Planktonlar suvdagi barcha oziqaviy moddalarni iste’mol qiladi, aks holda ular yorug‘lik yetishmasligi tufayli nobud bo‘ladi. Ularning qoldiqlari dengiz tubiga cho‘kadi va bakteriyalar tomonidan parchalanadi. Bu suvdagi kislorod miqdorining kamayishiga va juda ko‘p miqdorda baliqlarning o‘lishiga olib keladi.
Mutaxassislar suv namunalarini olib, unda El-Ninyo fenomeni kelishi bilan faollashgan Noctiluca scintillans turidagi planktonni topishgan.
Ushbu kashfiyotdan so‘ng olimlar iqlim o‘zgarishi va bir hujayrali organizmlarning ko‘payishi o‘rtasida bog‘liqlik bor-yo‘qligini tekshirishga qaror qilishgan.
Katta ehtimol bilan, Tinch okeanining olisroq qismida sodir bo‘lgan El-Ninyo hozir Tailandga ta’sir qilmoqda. Ushbu hodisa qurg‘oqchilik va dengiz haroratining ko‘tarilishiga olib keladi. Olimlarning ta’kidlashicha, plankton ko‘payishi va El-Ninyo o‘rtasida bog‘liqlik bor.
Biroq, bu borada hali aniq xulosa yo‘q. Mutaxassislar tadqiqotni davom ettiradilar.
Sun’iy yo‘ldoshdan olingan ma’lumotlar shuni ko‘rsatadiki, so‘nggi 20 yil ichida dunyo okeanining 56 foizi suvi ko‘kdan yashil rangga o‘zgargan. Suv rangidagi o‘zgarishlarni chuqurroq o‘rganish maqsadida 2024-yil yanvar oyida NASA fazoviy qurilmasini uchirish rejalashtirilgan. U plankton, aerozollar, bulutlar va okean ekotizimi ortidan kuzatuv olib boradi.
