Amerikalik tadqiqotchilar noodatiy kalmar Taonius Borealis'ni yaqindan tasvirga olishga muvaffaq bo‘lishdi. Ushbu antiqa suv jonzoti AQSHning okean va atmosfera tadqiqotlari milliy boshqarmasining (NOAA) okeanni o‘rganuvchi guruhi olimlari tomonidan Alyaska qirg‘oqlari yaqinida aniqlangan.
Kalmar Tinch okeanining Aleut orollari atrofidagi suvlarida 700 metr chuqurlikda suzib yurgan. Dengiz jonzoti NOAA Okeanos Explorer qurilmasi kameralari yordamida tasvirga olingan. Qurilma kam o‘rganilgan suvosti hududlarini xaritalash uchun suvga tushirilgan edi.
Tasvirda shaffof tanali va sharsimon qizil ko‘zlari bo‘lgan kalmarni ko‘rish mumkin. Kalmar o‘zining noodatiy ko‘rinishi bilan “o‘zga sayyoralik mavjudot”ni eslatib yuboradi. Uning barcha muhim a’zolarini o‘z ichiga olgan tanasining asosiy qismi pastga yo‘nalgan, kichik qo‘llari esa tanasining yuqori qismidagi ko‘zlari ustida yig‘iq holda.
Kalmardagi eng katta a’zo qizil rangdagi ovqat hazm qilish bezi bo‘lib, uning yon tomonidagi ikkita oq qopcha jabralaridir.
Tasvirdagi kalmarning o‘lchami noma’lum, biroq Xalqaro tabiatni muhofaza qilish ittifoqi ma’lumotlariga ko‘ra, bu turdagi kalmar 65 santimetrgacha o‘sishi mumkin.
"Bu kalmar ushbu suvlarda keng tarqalgan oddiy kalmardir, biroq uning yirik plandagi suratlarini oddiy deb bo‘lmaydi", deya hayrat bildirilgan NOAA'da.
