Karib dengizida 500 yoshli qadimiy akula tutildi

Karib dengizidagi Beliz davlati yaqinida baliqchilar yoshi 500 yilga yetishi mumkin bo‘lgan, ko‘zi ojiz qadimiy Grenlandiya akulasini tutishdi.

Baliq ovi vaqtida baliqchilar bilan birga Florida xalqaro universiteti aspiranti Devanshi Kasana ham bo‘lgan. Kasananing aytishicha, dastlab u qarmoqqa olti jabrali akula ilingan, deb ishonchi komil bo‘lgan. “Biroq, bu g‘ayrioddiy akula bo‘lib chiqdi. Baliqchilarning aytishicha, ular ham ilgari bunday narsani ko‘rishmagan”, deya uning so‘zlarini keltiradi The Mirror nashri.

Kasana akulani suratga olgan va uni rahbariga yuborgan. U esa, o‘z navbatida, gap Grenlandiya akulasi haqida ketayotganini aytgan.

"Men har doim dengiz tubiga qarmoq tashlash imkonini intiqlik bilan kutaman, chunki u yerda biz Belizda hali ko‘rmagan narsalar borligini bilaman. Ammo Grenlandiya akulasini tutaman, deb hech o‘ylamagandim", deb o‘z taassurotlari bilan bo‘lishgan baliqchi Omar Fauks.

Mutaxassislarning fikricha, ushlangan akulaning yoshi taxminan 500 yil bo‘lishi mumkin. Bu tur uzoq umr ko‘rishi bilan ajralib turadi. Shu bilan birga, u kamdan-kam holatlarda qarmoqqa ilinadi.