Britaniyalik olimlar sayyoramizning eng g‘ayrioddiy yerlaridan biri – Bermud uchburchagi sirini fosh qilishga muvaffaq bo‘lishganini ma’lum qilishdi. XX asrning 50-yillaridan beri jumboqlar ixlosmandlarini tinch qo‘ymayotgan bu sirni hududda ko‘p miqdorda suv o‘tlari va xavfli oqimlar mavjudligi bilan tushuntirish mumkin. Bu haqda IFLScience ilmiy portali xabar bermoqda.
Associated Press muxbiri Edvard Van Uikl Jons birinchi bo‘lib Bermud uchburchagi anomaliyasi haqida bong ura boshlagan. U jamoatchilik e’tiborini bu hududda g‘ayritabiiy ko‘p sonda kemalar va samolyotlar falokatga uchrashiga qaratgan. O‘shandan beri bu falokatlarni tushuntirishga ko‘p urinishlar bo‘ldi. Ular orasida sirli radiatsiya va metanning sizib chiqishidan tortib, qadimgi atlantlar va o‘zga sayyoraliklarning qilmishi degan taxminlar ham bildirildi.
Bermud uchburchagi AQSHning Florida shtati, Bermud orollari va Puerto-Riko sohillari bilan chegaralangan suv hududi hisoblanadi.
Olimlarning fikricha, Bermud uchburchagidagi barcha falokatlarga Atlantika okeanining shu qismida joylashgan va Sargasso dengiziga nom bergan sargassum turiga mansub suvo‘tlar sabab hisoblanadi. Shuningdek, ushbu hududda kemalarga xavf tug‘diruvchi kuchli oqimlar ham mavjud.
Ma’lumki, 1492-yilda Kristofer Kolumb boshqaruvidagi "Santa Mariya" kemasi bir necha kun Sargasso dengizida suvo‘tlar orasida o‘ralashib qolgan. O‘shanda dengizchilar jamoasiga omad kulib boqqan va ular suv o‘tlari asirligidan ozod bo‘lishgan.
Biroq boshqa kemalar omadsizlikka uchragan bo‘lishi mumkin va bu Bermud uchburchagida sirli yo‘qolishlar haqida turli mish-mishlarni keltirib chiqargan.
Ammo olimlar bildirgan taxmin ushbu hududda yuz bergan aviahalokatlar sababini tushuntirib bera olmaydi. Boshqa tomondan esa, statistik ma’lumotlarga ko‘ra, Atlantika okeanining ushbu qismida kemalar va samolyotlarning g‘oyib bo‘lishi holatlari boshqa hududlarga nisbatan uncha ko‘p emas.
